OCHL. “Lokomotiv” – “Sepaxon”. Bugungi tadbirlar haqida
05 apr 2016 18:23
Yangiliklar

OCHL. “Lokomotiv” – “Sepaxon”. Bugungi tadbirlar haqida

Ertaga “Lokomotiv” o'z maydonida Eronning “Sepaxon” klubini qabul qiladi. Osiyo chempionlar ligasining 4-turidan o'rin olgan mazkur bahsga muxlislarning qiziqishi katta.

Xabaringiz bor, Isfahon shahrida kechgan birinchi o'yinda “Loko” 2:0 hisobidagi g'alaba bilan qaytgandi. O'sha o'yinda Marat Bikmaev hamda Sardor Mirzaev tomonidan kiritilgan gollar “temiryo'lchilar”ga uch ochkoni taqdim etgandi. Ertangi bellashuvda ham “Lokomotiv” faqat g'alabani ko'zlab maydonga tushadi.

Bugun navbatdagi uchrashuv oldidan odatga ko'ra rasmiy tadbirlar tashkil qilindi. Avvaliga har ikkala klub menejerlari, shuningdek uchrashuv rasmiylari ishtirokida ananaviy miting tashkil qilingan bo'lsa, undan keyin ikkala jamoa bosh murabbiylari hamda futbolchilar ishtirokida o'yinoldi matbuot anjumani o'tkazildi.

Miting davomida ertangi uchrashuvda kimning qaysi rangli liboslarda to'p tepishi oydinlashdi. Demak, “Lokomotiv” oq, “Sepaxon” esa sariq-qora liboslarda o'ynaydi.

Tushdan so'ng avvaliga “Sepaxon”, keyin “Lokomotiv” o'yin bo'ladigan stadionda rasmiy mashg'ulot o'tkazdi. Ikkala jamoa ham o'zining mavjud tarkibi bilan mashg'ulot o'tkazdi. “Sepaxon” safida hamyurtimiz Fozil Musaev ham shug'ullandi. Ertangi o'yinni “Loko” himoyachisi Nemanya Yanichich jarohati bois o'tkazib yuboradi. Lekin Jasur Hasanovning ikki o'yinlik diskvalifikaciyani o'tab yana safga qaytishi muxlislarni quvontirishi turgan gap.

Ertaga bo'lib o'tadigan “Lokomotiv” – “Sepaxon” bahsi soat 16:00da boshlanadi. Uchrashuvni bahraynlik hakamlar brigadasi boshqarib boradi. Bosh hakam: Ali Hasan Ibrohim Abdulnabi. Biz “Lokomotiv”ga befarq bo'lmagan muxlislarni TTZdagi stadionga chorlab qolamiz.