OCHL-2019. AGMKning taxminiy raqiblari haqida batafsil

AGMK guruh bosqichiga chiqishi uchun ikkita raqibni mag'lub etishi kerak. Biz O'zbekiston klubining taxminiy raqiblari haqida malumot berishga qaror qildik.  


Birinchi saralash bosqichi
5 fevral
Tojikiston chempioni - Bahrayn chempioni

Ikkinchi saralash bosqichi
12 fevral
AGMK (O'zbekiston) - Birinchi saralash bosqichi g'olibi

Pley-off bosqichi
19 fevral
"Al Nassr" (Saudiya Arabistoni) - Ikkinchi saralash bosqichi g'olibi

Tojikiston chempioni
Hozircha bu raqib nomi malum emas. Sababi Tojikistonda chempionat 4 dekabr kuni o'z yakuniga etadi. Ayni paytda 18ta o'yindan so'ng Dushanbening "Istiqlol" klubi 45 ochko bilan peshqadamlik qilmoqda. Xuddi shuncha o'yin o'tkazgan "Xo'jand" hisobida 42 ochko bor. Ikkala klub ham yana 3ta o'yin o'tkazishadi. Oxirgi to'rt yilda Tojikiston chempioni bo'lib kelayotgan "Istiqlol"ning bu yil ham tengsiz bo'lish uchun imkoniyatlari juda yaxshi.

Mazkur klub Osiyo chempionlar ligasi guruh bosqichida hech qachon ishtirok etmagan. OFK kubogida esa 2015 va 2017 yillarda finalga qadar etib borgan.

O'tgan hafta "Istiqlol" Tojikiston kubogi finalida "Regar-TadAz" klubini 1:0 hisobida mag'lub etib, ettinchi marta mamlakat kubogi sohibiga aylandi. Bu Tojikiston klublari uchun mutloq rekord hisoblanadi.

Bu yil "Istiqlol" safida o'zbekistonlik yarim himoyachi Jahongir Abdumo'minov to'p tepmoqda. Jamoada ukrainalik himoyachi Artyom Baranovskiy ham o'ynamoqda.

Jamoa bosh murabbiyi vazifasini Alisher To'xtaev bajarmoqda.

Bahrayn chempioni
Bahraynning amaldagi chempioni "Muharraq" klubi hisoblanadi. Bu yil ushbu klub o'z tarixida 34-marta chempionlikni nishonladi. SHohruh Gadoevning sobiq jamoasi ham Osiyo chempionlar ligasi guruh bosqichida hech qachon o'ynamagan. 2008 yilda "Muharraq" OFK kubogida g'olib chiqqan edi. Bugungi kunda jamoani bahraynlik mutaxassis Salmon SHarida boshqarmoqda.

2017 yilda OCHL pley-off bosqichida "Nasaf" Bahrayn chempioni "Al Hidd" klubini 4:0 hisobida mag'lub etgani ko'pchilikning yodida bo'lsa kerak.

"Muharraq" safida suriyalik Ahmad Dib, kongolik Alvaro Portilo, braziliyalik Felipino kabi legionerlar o'ynashmoqda.

Saudiya Arabistoni chempionati 3-o'rin sohibi
O'tgan mavsum Saudiya Arabistoni chempionatida "Al Nassr" klubi bronza medaliga ega chiqqan edi.

Ushbu jamoani bugungi kunda urugvaylik Xose Daniel Karreno boshqarib bormoqda. Ushbu murabbiy Qatar terma jamoasidagi ishi orqali o'zbek muxlislariga tanish. JCH-2018 saralashida O'zbekiston terma jamoasi Qatarni safarda mag'lub etgach ushbu murabbiy istefoga chiqqan edi.

2011, 2015 va 2016 yilgi mavsumlarda Osiyo chempionlar ligasi guruh bosqichida ishtirok etgan. Faqat 2011 yilda jamoa guruhdan chiqib 1/8 finalda yutqazib qo'ygan edi.

"Al Nassr" safida avstraliyalik darvozabon Bred Jons, perulik Kristian Ramos, marokashlik Abdulrazzoq Hamdallah va Nurdin Amrabat, braziliyalik Juliano, Brunu Uvini va Petros, Nigeriya terma jamoasi hujumchisi Ahmad Musa kabi mashhur legionerlar bor. Mahalliy futbolchilardan Yahyo Al SHehri, Omar Havsavi, Muhammad Al Sahlavi aynan shu klubda faoliyat olib borishmoqda.

Ayni paytda Saudiya Arabistoni ligasida 7ta tur ortda qoldi. "Al Nassr" 6ta g'alaba va 1ta durang bilan musobaqa jadvalida yakka peshqadam bo'lib turibdi.