"Nasaf" - "Andijon" 5:0 yoxud chorak final sari dadil qadam

SHu kuni “Markaziy” stadionga tashrif buyurgan muxlislar sevimli jamoalari ijrosida gollar shousiga guvoh bo'lishdi. Uchrashuvning 11-daqiqasidayoq “Nasaf”ning tezkor hujumi gol bilan yakunlandi. Kenja To'raev o'ng qanotdan jarima maydonchasiga yorib kirdi va chap qanot yarim himoyachisi Farruh Sayfievni ajoyib pas bilan taminladi. Farruh esa 2-3 metr masofadan darvozani nishonga olmasligi mumkin emasdi – 1:0. Goldan biroz o'tib mehmonlarda hisobni tenglashtirish uchun yaxshi imkoniyat yuzaga keldi. Temur Sultonovning jarimadan yo'llagan kuchli va aniq zarbasini Mixail Naumov qiyinchilik bilan qaytargan bo'lsada, takroriy zarbani yo'llashda mehmonlar hujumchilari biroz xatolikka yo'l qo'yishdi. Bo'limning so'nggi daqiqalarida Artur Gevorkyan “Andijon” posboni bilan deyarli birga bir vaziyatga chiqib bordi va uning zarbasidan keyin to'p darvoza ustuniga tegib to'rga yo'l oldi – 2:0.

Ikkinchi bo'limda ham o'yin “scenariy”si o'zgarmadi. Mezbonlar hujum ustiga hujum uyushtirishdi, mehmonlar esa qarshi hujumlarda o'z imkoniyatlarini kutishdi. Ammo 57-daqiqada to'p uchun kurashda “Andijon” yarim himoyachisi Ibrohim Otaxonov “Nasaf” sardori bilan to'psiz kurashga kirishib ketdi. Natijada bosh hakam Gevorkyanga sariq, Otaxonovga esa qizil kartochka ko'rsatdi. O'yinning uchdan bir qisimini biri kishi kam bo'lib o'tkazgan Abduraimov shogirdlari qisqa vaqt ichida o'z darvozalaridan yana uchta to'p o'tkazib yuborishga majbur bo'lishdi. Dastlab Artur Gevorkyanning maydon markazidan uzatib bergan to'pini Kenja To'raev raqib jarima maydonchasi ichida qabul qilib oldi va bir himoyachini ustalik bilan aldab o'tib, kuchli zarba bilan darvoza to'rini aniq nishonga oldi- 3:0. Oradan besh daqiqa o'tib zaxiradan maydonga tushgan Igor Taran joriy mavsumda “Nasaf” tarkibida o'zining ilk golini urishga erishgan bo'lsa, 77-daqiqada o'ng burchakdan uzatilgan to'pni “Nasaf” markaziy himoyachisi SHerzod Azamov osonlik bilan mehmonlar darvozasiga yo'llab, o'yinda yakuniy hisobni o'rnatdi – 5:0.

Ushbu jamoalar o'rtasida nimchorak finalning javob uchrashuvi 26 may kuni Andijonda o'tkaziladi.

 
O'zbekiston kubogi. 1/8 final. Birinchi uchrashuv. 10.05.2014.

“Nasaf” – “Andijon” 5:0 (2:0)
Qarshi shahri. “Markaziy” stadion. 2021 tomoshabin.
Hakamlar: Olim Tolibjonov, Alisher Usmonov, Timur Gaynullin, Naim Qosimov.

Nazoratchi: Rashid Aytekov.

“Nasaf”: 1. Mixail Naumov, 5. Botir Qoraev, 7. Akramjon Bahriddinov (19. Igor Taran, 63) 10. Kenja To'raev (16. Alisher Yusupov, 81), 17. Artur Gevorkyan (s) (29. Ulug'bek Dadaboev, 72) 20. Erkin Boydullaev, 23. SHerzod Azamov, 27. Ilhom Yunusov, 28. SHuhrat Muhammadiev, 32. Hamza Karimov, 34. Farruh Sayfiev.

Zaxiradagilar:  30. O'tkir Yusupov, 14. Laziz Ubaydullaev, 33. Odiljon Hamrobekov, 38. Doniyor Narzullaev.

“Andijon”: 32. Timur G'aniev, 3. Davron Tursunov (19. Alisher To'xtasinov, 46), 5. Aleksey Kasyan, 6. Ibrohim Otaxonov, 7. Bekzod G'oziev, 8. Bahrom Abdurahmonov ( 17. Mirzakamol Kamolov, 65), 14. Akmal Jo'raboev, 18. SHaxzod SHaymanov, 20. Timur Sultonov, 28. Rasul Rahmonov (4. Rahimjon Qodirov, 77) 55. Asror Rahmonov.

Zaxiradagilar: 1. Muhiddin Xudoyorov, 9. Lochin Soliev, 10. Anvar Rajabov22. Kamronbek Kapadze.

Gollar: Farruh Sayfiev (11), Artur Gevorkyan (45), Kenja To'raev (70), Igor Taran (75) SHerzod Azamov (77).

Ogohlantirish: A. Gevorkyan (57) – B. Abdurahimov (52), B. G'oziev (53).

CHetlatish: I.Otaxonov (58).