Mirjalol Qosimov: "Kelinglar, pashshadan fil yasamaylik"

- O'yin haqida

- Yaxshi o'yin bo'ldi. Yarim finalni maqsad qilgandik va bunga erishdik. O'yin jangovor ruhda o'tdi. Bu taklif sifatida, maydon sifatini yaxshilash kerak. Bu maydon futbolning tezligini yo'qotadi. "Andijon" bejizga Pro-ligada birinchi o'rinda emas, jamoaning kuchi Superligada o'ynashga ham etadi. Viktor Kumikovni bilaman, murabbiy sifatida qo'lida tahsil olganman. Jamoada bo'ydor futbolchilar yig'ilgan va asosiy urg'u standart vaziyatlarga qaratilmoqda. Agar bugun Alisherni maydonga tushirganimda Bogdan Milich ikki barobar katta bo'lardi. 

- Pro-liga va Superliga o'rtasidagi farqni sezdingizmi?

- Farqi sezilmadi. O'zi vodiyda o'ynash oson emas. Aytib o'tdim, jamoa bejizga Pro-ligada birinchi o'rinda emas. Keyingi o'yinlarda omad tilayman. Agar maydon sifati to'g'rilansa, bu erda ham muxlislar tezkor futbol ko'rishadi.

- Jamoangiz o'yinning qaysidir qismida sarosimaga tushgandek ko'rindi...

- Yo'q, nega bu sarosima emas. "Andijon" ko'proq yuqoridan yo'llangan uzatmalarga tayanib o'ynadi. Erlatib o'ynashga maydon sifati javob bermasdi. Bu futbol, kimdir yutadi, yana kimdir esa yutqazadi. Qo'rqsa, maydonga chiqish kerakmas.

- Sanjar Tursunovning nojo'ya harakatini qanday baholaysiz?

- U bilan hammasi normal xolatda. Kelinglar, shu xolatni noto'g'ri tasavvurga olib bormaylik. Masalan, sizni so'ksa nima deysiz? U uyat dedi xolos. Kelinglar, pashshadan fil yasamaylik. Biz muxlislar uchun o'ynaymiz. Agar yomon ish bo'lganida o'zim muxlislardan uzr so'ragan bo'lardim.