"Lokomotiv" uch nafar futbolchi bilan xayrlashdi

"Lokomotiv"ni transfer oynasining birinchi kunida uch nafar futbolchi tark etdi. Bular - darvozabon Ignatiy Nesterov, himoyachi Davron Hoshimov hamda yarim himoyachi Oybek Qilichev. 

Tajribali posbon Ignatiy Nesterov "temiryo'lchilar" tarkibiga 2014 yil kelib qo'shilgandi. U dastlabki besh mavsum jamoamiz sharafini himoya qilib uch bor O'zbekiston chempioni, uch bor O'zbekiston Kubogi sohibi, bir marta O'zbekiston Superkubogi sohibi kabi sovrinlarni qo'lga kiritdi. SHuningdek, 2016 yil jamoamizning Osiyo chempionlar ligasi chorak finalga qadar borishida munosib hissa qo'shdi. 

O'tgan yilning malum bir qismini Saudiya Arabistonining "Ohod" klubida o'tkazgan Nesterov shundan so'ng yana "Loko"ga qaytib Superliga oxirgi beshta turida "temiryo'lchilar" darvozasini himoya qildi. Nesterov bu yilgi mavsumni ham "Loko" safida boshladi va jamoa sardori sifatida futbolchilarni maydonga boshlab chiqdi. Lekin yozgi transfer oynasi payti u jamoa almashtirishga qaror  qildi va bu niyatini "Lokomotiv" PFK rahbariyati darvozabon xohish-istagidan kelib chiqqan holda qo'llab-quvvatladi. Natijada har ikki tomon roziligi bilan Ignatiy Nesterov shartnomasi bekor qilinib, mohir darvozabon erkin agent sifatida jamoamizni tark etdi. 

Tajribali himoyachi Davron Hoshimov ham "Lokomotiv" bilan xayrlashdi. Bir yarim mavsum klubimiz sharafini himoya qilgan Hoshimov "Loko"ning o'tgan yil O'zbekiston chempionatida kumush medallarni qo'lga kiritishida munosib hissa qo'shdi. SHuningdek, yil boshida jamoamizga qo'shilgan tajribali yarim himoyachi Oybek Qilichev ham "temiryo'lchilar"ni tark etdi. "Lokomotiv" PFK har uchala futbolchiga klub oldidagi xizmatlari uchun minnatdorchilik bildiradi hamda ularning keyingi faoliyatida omad tilaydi.