Karles Puyol championat.asia saytiga eksklyuziv intervyu berdi

Tashrif chog'ida "Barselona" afsonalaridan biri Championat.asia sayti bosh muharriri Narzulla Saydullaevga qisqa eksklyuziv intervyu berdi.

- Siz 2010 yil yarim finalida Germaniyaga gol urgansiz va Ispaniya ilk bor finalga chiqqandi. O'sha kunni qanday eslaysiz?
- Bu biz uchun juda muhim kecha bo'lgandi. O'sha bahsni yaxshi eslayman, biz jamoaviy tarzda ishlab, g'alabaga erishgandik. Bu g'alaba faqat meniki yoki boshqa futbolchiniki emasdi, nafaqat yarim finalda umuman o'sha mundialda chempion bo'lish uchun jamoaviy o'yin namoyish etgandik.

- Siz o'ynagan davrni Ispaniya futboli tarixidagi eng kuchli avlodga ega edi deyishadi. Bunga qanday erishgandingilar? Nima deb o'ylaysiz bu yilgi Jahon chempionatida Ispaniya yana mundialda g'olib bo'la oladimi?
- Ha men o'ynagan paytda tarkibda juda kuchli futbolchilar bor edi. Bu 2008 yildan boshlangandi. O'sha vaqtdagi bosh murabbiyimiz Luis Aragones bizning mentalitetimizni biroz o'zgartirgandi: bor etiborimizni faqat g'alabaga qaratgandi. Biz g'alaba uchun faqat mehnat va harakat qilmadik, balki aqlni ham ishlatdik. 2008 yilda Evropa chempioni bo'ldik. Keyin 2010 yilda Jahonda tengsiz jamoaga aylandik. Hozir ham Ispaniya terma jamoasida yaxshi futbolchilar bor. Ispaniya diyori doim yaxshi futbolchilarni o'stirgan va hozirgi terma jamoamiz ham Jahon chempioni bo'ladi deb umid qilamiz.