Hakim Fuzaylov: "Muxlislarimizni 15 yil kutilgan g'alaba bilan tabriklayman"

"Futbolchilarimdan minnatdorman. Mening fikrimcha, aprel oyiga qadar shunday o'yinlar guvohi bo'lamiz. Superliga darajasi ancha yuqori. Biz 15 yil deganda eng yuqori divizionga qaytdik. Bu juda yoqimli holat. Viloyat rahbarlariga va klub mutasaddilariga rahmat aytaman. Shuningdek, muxlislarimizni 15 yil kutilgan g'alaba bilan tabriklayman" - dedi Hakim Fuzaylov bugungi o'yin haqida.

- "Xorazm" jamoasi yangi mavsum startidan oldin o'z safiga bir nechta tajribali futbolchilarni qo'shib oldi. Jamoa amalga oshirgan transferlardan va yig'ilgan tarkibdan qanchalik ko'nglingiz to'lmoqda? Bugun jamoangiz namoyish etgan o'yindan qanchalik qoniqdingiz?

- Biz jamoa tarkibini to'liq yangiladik. Yigitlarda o'yinni oldindan o'qishi va bir-birining harakatlarini tushunishda muammolar kuzatilmoqda. Hozirgi kunda deyarli barcha jamoalarning holati teng, deb o'ylayman. Biz 18ta yangi futbolchini jalb etdik, bu yangi jamoa tuzganimizdan dalolat. Vaqt o'tishi bilan "Xorazm" jamoasining o'yini yaxshilanib boraveradi. Bunga faqat biroz vaqt kerak.

- Jamoa yangi mavsumda o'z oldiga qanday maqsadlar qo'ydi?

- Oldindan bir narsa deyish qiyin. Ishtaha taom ustida keladi deyishadi. Chempionat qizg'in pallaga kirganida, bir to'xtamga kelamiz. Biz 15 yillik tanaffusdan so'ng yana yuqori divizionga qaytdik. Menimcha, ligada jon saqlab qolishimiz dastlabki maqsadimiz bo'lishi kerak.

- Barcha murabbiylar dastlabki turlar qiyin kechadi deb aytishmoqda. Siz ham shu haqda gapirib o'tdingiz. "Xorazm" jamoasi o'zining eng yaxshi o'yinini namoyish etishi uchun yana qancha vaqt kerak bo'ladi?

- Buni taqvimga qarab aytishim mumkin. Mart oyida biz uchta o'yin o'tkazamiz. Aprel oyida esa Kubok bahslari ham boshlanadi, aprelda ettita bahsda ishtirok etamiz. Taxminan, may oylarida jamoa ancha etilib qoladi deb o'ylayman.