Hakim Fuzaylov: "Jamoam namoyish etgan o'yindan uyalmayman"

"Biz qiyin o'yin bo'lishini kutgan edik. "Paxtakor" murabbiy almashganidan so'ng boshqacha futbol o'ynamoqda. So'nggi uch turda jamoa 15ta gol urdi va bor-yo'g'i 3ta gol o'tkazib yubordi. Jamoam namoyish etgan o'yindan uyalmayman. Biz raqib hujumlariga o'z hujumlarimiz bilan javob bera oldik. Yaratgan vaziyatlarimizdan foydalana olmadik. Yana bir bor so'nggi soniyalarda gol o'tkazib yuborgan holda mag'lub bo'lyapmiz" - deydi Hakim Fuzaylov bugungi bahs haqida.

- "Paxtakor" birinchi bo'limda ko'plab hujumlar uyushtirdi va "Xorazm"ni himoyalanishga majbur qila oldi. Tanaffusdan keyin esa "Xorazm" ko'plab vaziyatlar yaratdi va mening nazarimda ustunlik qildi. Tanaffusda futbolchilarga nimalar dedingiz? Jamoangiz ikki xil taym o'tkazganining sababi nimada?

- Biz "Paxtakor" hozir yaxshi formada ekanligini bilar edik. Ikkinchi bo'limda ko'proq to'pga egalik qilishimiz kerakligi haqida aytdim. Shundan so'ng vaziyatlarga ega bo'la boshladik. Afsuski, imkoniyatlarimizdan foydalana olmaymiz. Bu bizning kasalimiz. Agar yana gol ura olganimizda "Paxtakor" g'alaba qozonishi yanada qiyinlashgan bo'lar edi.

- O'yin boshlanishidan avval Shahrom Samiev asosiy tarkibdan tushib qoldi. U o'yindan oldin jarohat oldimi?

- Ha. Chigil yozdi mashg'ulotlarida jarohat oldi. Endi ertaga shifokor ko'rigidan o'tishi kerak bo'ladi.

- Oldinda FIFA kunlari bor. Ushbu tanaffusdan qanday foydalanmoqchisiz?

- Bizda katta tanaffus bo'lmaydi, sababi biz "Qizilqum"ga qarshi qoldirilgan o'yinni o'tkazamiz. Chempionatda endi 10ta o'tkazildi, oldinda hali 20ta uchrashuv bor.