Gabriel Jezus qachon safga qaytadi?

"To'pchilar" hujumchi Gabriel Jezusning maydonga qaytishi bilan uzoq kutilgan Premer-liga chempionligini qo'lga kiritish uchun kurashida katta kuchga ega bo'ladi.

Braziliyalik forvard Jahon chempionati chog'ida noyabr oyida tizzasidan olgan jarohati tufayli shu paytgacha jamoasiga yordam bera olmayotgandi. U SHimoliy Londonga qaytdi va jarrohlik amaliyotidan o'tganidan keyin klub tibbiyot xodimlari tomonidan tiklanish dasturiga olindi. 

Endi xabar qilinishicha, Jezus kutilganidan ancha avval oldingi holatiga qaytishi mumkin. Futbolchi kelasi oy terma jamoalar o'rtasidagi o'yinlar tufayli yuzaga keladigan tanaffus oldidan tayyor bo'lishi mumkin.

Ichki liga o'yinlari "Arsenal" uchun 19 martdagi "Kristall Pelas"ga qarshi bahsdan keyin kichik muddatga to'xtatiladi va aynan mana shu o'yinda Jezus maydonda harakatlanishi mumkin.

Bundan oldin London klubi bir qator muhim o'yinlarni o'tkazadi. Dastlabki ikkitasi shu haftada quyi ligaga tushib ketmaslik uchun kurashayotgan "Everton" va "Bornmut"ga qarshi bo'lib o'tadi.

Jamoa ustozi Mikel Arteta hafta oxirida "Lester" ustidan zafar quchilgan o'yin oldidan yulduz hujumchining tiklanishi borasida qisqacha malumot berib o'tgan edi: "Uning holati yaxshilanib bormoqda. Maydonda ko'proq o'ynashga harakat qilmoqda. Uning tizzasida og'riq paydo bo'lmayapti, bu chindanda ijobiy holat".