Eshitdik-da! "Surxon" futbol klubining 2019-2022 yilgi moliyaviy faoliyati jiddiy o'rganiladi

Vazirlar Mahkamasi qaroriga ko'ra, "Surxon"ning shu kungacha bo'lgan moliyaviy-xo'jalik faoliyati mustaqil audit tekshiruvidan 10 yanvarga qadar o'tkazilishi, aniqlangan qarzdorliklar Surxondaryo viloyati hokimligi tomonidan bartaraf etilishi va shu jarayonda klub yangi investorga topshirilishi lozim edi. 

Olingan malumotga ko'ra, Surxondaryo viloyati hokimligi 10 yanvar sanasiga qadar Vazirlar Mahkamasi qarori ijrosini amalga oshira olmagan. Boisi audit tekshiruvi davomida juda katta miqdorda qarzdorlik aniqlangan. SHundan kelib chiqib, Surxondaryo viloyati hokimi futbol klubining 2019-2022 yillar davomidagi moliyaviy faoliyatini o'rganish masalasini viloyat Davlat moliyaviy nazoratiga oshirgan. Ayni vaqtda O'zPFL mazkur yillar davomida Liga ro'yxatidan o'tkazilgan shartnomalari nusxasini Surxondaryo futbol associaciyasiga taqdim etgan. 

Malum bo'lishicha, 2019-2022 yillar davomida O'zPFL ro'yxatidan o'tkazilgan shartnomalardan tashqari ham qo'shimcha shartnomalar imzolangan, biroq ular Liga ro'yxatidan o'tkazilmagan. Bu esa "Surxon" futbol klubiga ajratib kelingan mablag'ning maqsadsiz va samarasiz sarflanishiga olib kelgan. Oqibatda klubda katta miqdorda qarzdorlik vujudga kelgan. 

Qayd etish kerak, O'zPFL so'nggi uch yil davomida "Surxon" futbol klubi bilan bog'liq vaziyat sog'lom ruhda emasligini bir necha bor takidlab keldi. O'z navbatida, Liganing bu fikrlari surxondaryolik futbol muxlislari etiroziga sabab bo'ldi. Voqealar rivoji ko'rsatmoqdaki, Liga xavotiri o'rinli bo'lgan. "Surxon" futbol klubini 2019 yildan buyon boshqarib kelgan rahbariyat yillik xarajatlar smetasini shakllantirish va uni maqsadli yo'naltirish masalalarida qator kamchiliklarga yo'l qo'ygan. 

Xavotirli tomoni shundaki, O'zbekistonda qishki transfer oynasi yopilishiga 9 kun vaqt qoldi. Bu esa qatorasiga ikkinchi yil klubning yangi investorlariga muammolar tug'dirishini bildiradi. Ayni vaqtda viloyat hokimligi Vazirlar Mahkamasi qarori ijrosini tezlashtirishi talab etiladi.