Eldor Moyliev: "Uchrashuvning 17:00ga qo'yilgani ikki jamoaga ham noqulay bo'ldi"

"Bugungi o'yinning ikki bo'limi ham nazoratimiz ostida o'tdi. To'psiz, to'p bilan ham uchrashuv tizginini ushlab turdik degan bo'lardim. Bellashuvni soat 17:00ga qo'yilgani nafaqat bizga balki raqib jamoaga ham qiyinchilik tug'dirdi. Shu jumladan yigitlarga katta rahmat aytaman. Bu ularning yutug'i va mehnatidir. O'yin uchun minnatdorchilik bildiraman",- deydi Eldor Moyliev.  

- Mutaxassis sifatida o'yinni 17:00ga belgilanganligiga munosabatingiz qanday? Bu o'yin sifatiga tasir qiladimi? 

- Albatta, bu o'yin sifatiga qattiq tasirini o'tkazadi. Har bir vaziyatdan so'ng tiklanish qiyin kechadi. Tiklanishga ko'proq vaqt sarflanadi. Issiqda futbol o'ynash juda qiyin. 

- Futbolchilarga nechta gol urish vazifasi qo'yilgandi? "Ishtixon" "Sho'rtan"dan pastroq darajadagi klub hisoblanadi... 

-  Past darajada demagan bo'lardim, chunki u erda futbol o'ynaydigan yigitlar bor. Murabbiy ham yosh. "Mashal" bilan o'yinini ko'rganimizda iliq taassurot qoldirgandi. Biz futbolchilarga malum bir miqdorni aytmaymiz. Lekin bizga gol juda zarur edi. Ruhiyatimizni ko'tarish uchun kerak edi. Futbolchilar o'zi yaratgan vaziyatlardan foydalanib ishonchni qaytarishdi.  

- Anvar Berdiev tanlagan tarkib bilan sizniki nimasi bilan farq qiladi?  

- O'sha bitta tarkib, lekin bugun kubok bo'lgani uchun yoshlarga imkon berdik. Ular o'zlarini yaxshi tomonlama ko'rsatdi. Birinchi gol ham yosh futbolchimizning harakatidan so'ng urildi. Keyigi gollarda ham yoshlar qatnashdi. 

- Shohjahon Sultonmurodovning harakatlari qanday taassurot qoldirmoqda?  

- U bizning haqiqiy etakchi o'yinchimiz. Markazda 3 nafar himoyachi bilan o'ynaganimizda ham, ikkinchi bo'limda taktikamizni o'zgartirganimizda o'ngda yaxshi to'p tepdi. Tirishqoq, tezkor, yuqorida yaxshi o'ynaydi. Mehnat qilishdan to'xtamasa milliy jamoaga nomzod bo'la oladi.  

- Anvar Berdiev intervyusida hujumkor o'ynashini aytgandi. Lekin taroziga natija va tomoshabop o'yin qo'yilganida qaysi birini tanlaysiz? 

- Futbol millionlar o'yini. Biz o'zbekmiz. Muxlislarga hujumkor o'yin yoqadi. Lekin futbolning ajralmas qismi himoya. Orqani nolga ushlaganda durangga erishiladi. Umuman olganda hujumkor futbol tarafdoriman. Shu bilan birga himoyada ham mustahkam o'ynatishga harakat qilamiz.  

- "Sho'rtan" shu vaqtgacha nimaning hisobiga g'alabaga erisha olmay kelayotgandi? 

- Bunga ko'p narsalar bog'liq. Qaerdadir omad etishmadi. Biz har bir o'yinda yomon o'ynamadik. "Paxtakor", "So'g'diyona" bilan o'yin sifatida yomon ko'rinmadik. Ammo vaziyatlarni yakunlashda iqtidormi yoki erkinlik etishmadi. Hujumni yakunlashda qiynaldik.  

- Davralar oralig'ida hujumchiga ehtiyoj bormi? 

- Nafaqat hujum boshqa poziciyalarga ham sifatli futbolchilarni kuzatib boryapmiz. "Sho'rtan" rahbariyati, muxlislar uchun g'alaba muhim. Baribir jamoani kuchaytiramiz. 

- Hozir vaqtinchalikka tayinlandingiz. Rahbariyat oldingizga aniq vazifa qo'ydimi? 

- Rahbariyat doim chiroyli o'yin va g'alabalar orqali muxlislar ruhiyatini ko'tarish vazifasini qo'yadi. Shaxsan o'zimga aniq vazifa qo'yilmagan. Lekin g'alabani har bir rahbar istaydi. Rahbarimizni yuzini yorug' qilish uchun bor kuchimizni ishga solamiz.  

 - "Sho'rtan"da vaqt va imkoniyat etarlimi? 

- Turnir jadvalini olsak, jamoalar uzoqlashib ketmagan. 2 ta g'alaba orqali etib olish mumkin. Men futbolchilarga ishonaman. Bu ish qilsa bo'ladigan ish. Tarkibimizda iqtidorli futbolchilar bor.