Ektor Kuper boshchiligidagi O'zbekiston milliy terma jamoasi birinchi mashg'ulotni o'tkazdi

Yig'inga jalb qilingan futbolchilar poytaxtimizdagi "Jar" stadionida birinchi mashg'ulotni o'tkazishdi. Dastavval, Kuper futbolchilar bilan birma-bir tanishib chiqdi. Keyin mashg'ulotlarga start berildi.

Mashg'ulot davomida Ektor Kuperga uning yordamchilari Xose Karlos Fantagucci, Antonio Sarioglu va Mahmud Fayoz Muhammad yordam berishdi.

Avvaliga futbolchilar engil chigalyozdi mashqlarini olib borishdi. Keyin futbolchilar poziciyalariga ko'ra guruhlarga bo'linishdi. Har bir guruh bilan alohida mashq o'tkazildi.

Darvozabonlar bilan "Nasaf"dan chaqirilgan murabbiy Denis Ivankov ishladi. Keyin futbolchilar maydonning yarmida ikkiga bo'lingan holda futbol o'ynashdi. Mashg'ulotdan keyin futbolchilar muz to'ldirilgan basseynga tushib, tiklanish mashqlarini davom ettirishdi.

Mashg'ulotlar quvnoq kayfiyatda o'tganini, futbolchilar yangi murabbiy ko'z o'ngida astoyidil mehnat qilishganini ham alohida takidlab o'tish kerak.