Dublga erishib, jamoasiga muhim 3 ochko keltirgan sardor, jamoasi safarda irodali g'alabaga erishgani bois tur murabbiyiga aylangan chernogoriyalik mutaxassis - Superligada 13-tur laureatlari

"Championat.asia" o'tkazilgan bahslar asosida tur laureatlarini aniqladi.

"Surxon" posboni Artyom Potapov "Championat.asia" sayti talqiniga ko'ra 13-turning eng yaxshi darvozaboni deb topildi. 

Termizliklar darvozaboni ortda qolgan turda jamoasini ko'p marta goldan saqlab qoldi. Rossiyalik futbolchi faol harakatlari evaziga "So'g'diyona" bilan o'yinni "quruq" o'tkazdi va haqli tarzda tur darvozaboniga aylandi.

"Metallurg" sardori, hujumchi Zabihillo O'rinboev "Championat.asia" talqinida 13-turning eng yaxshi futbolchisi deya elon qilindi.  

Mahoratli futbolchi o'z harakatlari bilan o'yin davomida ajralib turdi, ayniqsa, uning ikkinchi taymdagi harakatlari tahsinga loyiq. O'rinboev dastlab jarimadan yo'llagan shedevr zarbasi orqali hisobni tenglashtirgan bo'lsa, o'yin yakuniga 10 daqiqa qolganida olis masofadan darvozani aniq nishonga oldi va bekobodliklar g'alabasini taminladi. Mutaxassislar fikricha, 28 yoshli futbolchi faoliyati davomidagi eng yaxshi mavsumini o'tkazmoqda.

"Olimpik" yarim himoyachisi Jasur Jaloliddinovning "Metallurg" darvozasiga jarimadan kiritgan qoyilmaqom to'pi "Championat.asia" talqiniga ko'ra 13-turning eng chiroyli goli (VIDEO) deb tan olindi. 

"Olimpik" azosi "Metallurg" bilan uchrashuvda jarimadan kuchli zarba yo'llab, Akmal Ortiqovga hech qanday imkoniyat qoldirmadi va hisobni ochdi.

"Metallurg" bosh murabbiyi Vesko Steshevich "Championat.asia" talqiniga ko'ra 13-turning eng yaxshi murabbiyi sifatida etirof etildi.

CHernogoriyalik mutaxassis qo'l ostidagi jamoa ikkinchi taymda bir kishi kam bo'lib qolganiga qaramay, 2 ta gol urishning uddasidan chiqdi. U o'yin uchun tanlagan tarkib o'zini oqladi. Bundan tashqari, u zaxiradan maydonga tushirgan futbolchilar faol harakat qilib, g'alabaga salmoqli hissa qo'shishdi.

Alohida aytish joiz, Vesko Steshevich joriy mavsumda ikkinchi marta tur murabbiyi bo'ldi.