Doston Tursunovning SHotlandiyadagi taqdiri nima bo'ldi? Uni keyingi mavsum legioner sifatida ko'ramizmi?

Xo'sh, nima uchun futbolchimiz legionerga aylanmadi? U erdagi taassurotlar qanday? Bu borada Doston Tursunov saytimiz jurnalisti Abdulaziz Iskandarovga batafsil fikrlarini bildirib o'tdi. 

- "Surxon" uchun bu yilgi mavsum qanchalik kutilgan va kutilmagan tarzda o'tmoqda? Jamoa oldida maqsad yo'qligi va bosimsiz o'ynayotgani ham tasir qilyaptimi?

- Muxlislar va jurnalistlar uchun kutilmagan bo'lishi mumkin. Lekin biz mavsum boshida yaxshi natija ko'rsata olishimizga ishongan edik. Natijalarimiz yaxshi. Bundan ham yaxshi qilishga harakat qilamiz. Bosimga kelsak, bizda barcha o'ziga ishongan. Yosh murabbiylar shtabi bilan yaxshi ishlayapmiz. Bosim barchada bo'ladi. Ayniqsa mavsum boshida bu sezildi. 

-  Jamoadagi eng katta lider kim? Umuman yosh futbolchi sifatida siz etakchi futbolchi deganda nimani tushunasiz?

- Jamoamizda aynan bitta futbolchini lider, demagan bo'lardim. CHunki har bir futbolchining o'z vazifasi bor. Biz maydonga bitta jamoa bo'lib tushamiz. Etakchi futbolchi deganda, kim bo'lishidan qatiy nazar maydonda borini beradigan, jamoani ortidan ergashtira oladigan futbolchini tushunaman. 

- SHotlandiya klubi "Livingston" varianti qachon paydo bo'ldi? Taassurotlar qanday?

- SHotlandiyaga to'xtaladigan bo'lsam, birinchi davra tugagandan so'ng agentlar aloqaga chiqishdi. "Livingston" murabbiyi o'yinimni ko'rganini aytishdi. Lekin vizalar sabab biroz kechikdim. Klubda yaxshi kutib olishdi. Baribir Evropa muhiti sezilib turadi. Hattoki, bitta uchrashuvda ham maydonga tushdim. Mashg'ulotlar, uning atrofidagi jarayonlar barchasi professional darajada. Klub uy uchrashuvlarini qabul qiladigan maydon suniy qoplamali hisoblanadi. Iqlimi yomg'irli. Lekin futbol o'ynaydigan sharoit. CHempionat o'yinlarini kuzatdim. Jismoniy taraflama katta kuch talab qilinadi. Nasib qilsa, bu men uchun o'sishimga katta turtki bo'ladi, deb o'ylayman. 

- Ular shunchaki  ko'rik uchun chaqirdimi? Keyingi mavsumda sizni "Livingston" safida ko'ramizmi?

- Bir yarim oy kech bordim. Bu pallada har bir poziciyada 3-4 nafar futbolchi bor edi. Murabbiy bilan gaplashdim. SHotlandiyada qishda birinchi davra yakunlanadi. SHundan keyingina bu masalani yana o'ylab ko'ramiz. 

- Legioner sifatida qaysi jamoa libosida to'p tepishni maqsad qilgansiz?

- Qanday jamoa bo'lishidan qatiy nazar maqsadim APLda o'zimni sinab ko'rish.