Coca Cola Superligasi. Eng ko'p zarbani eng ko'p gol o'tkazib yuborgan jamoalardan biri yo'llagan

Coca Cola Superligasining birinchi davrasi yakuniga etdi. Ilk davra bazi jamoalar uchun omadli kelgan bo'lsa, bazilari uchun noxush tarzda yakunlandi. SHunday bo'lsa-da, ko'ngildagidek natija qayd etolmagan jamoalar ham bazi jabhalarda ustunlikka ega bo'ldi. Keling, davra davomida eng ko'p zarba yo'llagan jamoalar bilan tanishamiz. 

Statistikaning katta qismi O'zPFL rasmiy saytidagi ko'rsatkichlarga asoslangan holda shakllantirildi. Ehtimol, ro'yxat siz o'ylagandan farq qilishi mumkin. 

Ishonmasligingiz mumkin, lekin raqib darvozasi tomon eng ko'p zarba turnir jadvalida 10-o'rinda borayotgan hamda o'z darvozasidan to'p o'tkazib yuborish borasida ikkinchilardan bo'lib turgan (18 ta gol qabul qilib olgan) "So'g'diyona"ga tegishli hisoblanadi. Jizzaxliklar 152 bor raqib darvozasini "o'qqa tutgan". Bu borada ikkinchi ko'rsatkich "Navbahor"ga tegishli. Samvel Babayan shogirdlari umumiy 143 ta zarba yo'llagan bo'lsa, OKMKda namanganliklardan bitta kam zarba yo'llagan.

Eng yomon ko'rsatkich esa "Surxon"ga tegishli. Toshkent jamoasi deb atasak ham xato bo'lmaydigan klub 83 marotaba urinib ko'rgan. "Olimpik"da esa zarbalar soni 94 tani tashkil etadi.

SHuningdek, bir o'yinda eng ko'p zarba yo'llash bo'yicha "Navbahor" yuqori ko'rsatkichga ega chiqdi. Namanganliklar "Olimpik"ga qarshi bahsda 21 marta o'z omadini sinab ko'rgan.

Oqil Abdubarnoev tayyorladi.