Bugun futbol. "Neftchi" - "Bunyodkor"
25 apr 2022 13:53
Yangiliklar

Bugun futbol. "Neftchi" - "Bunyodkor"

Bugun bo'lib o'tadigan ikkita o'yin bilan Superliganing 5-tur bahslariga start beriladi.

Bugun "Neftchi" Yaypandagi markaziy stadionda "Bunyodkor" bilan kuch sinashadi. Turnir jadvalida "Neftchi" 3 ochko bilan 12-o'rinda boryapti. "Bunyodkor" esa 7 ochko to'plagan holda 5-o'rinni egallab turibdi. "Neftchi"da to'plar nisbati 2-6, "Bunyodkor"da esa 5-5.

Yangi mavsumni g'alaba bilan boshlagan "Neftchi" shundan so'ng qatorasiga uchta bellashuvda imkoniyatni boy berdi. Farg'onaliklar ilk turda "Qo'qon-1912"dan 1:0 hisobida ustun kelgandi, biroq "Paxtakor", "So'g'diyona" va "Qizilqum" bilan bahslarda mag'lubiyatga uchrashdi.

"Bunyodkor" haqida gapiradigan bo'lsak, bu jamoa joriy chempionatni durang bilan boshladi. "Qaldirg'ochlar" uyda "So'g'diyona" bilan 0:0 hisobini qayd etib, keyingi tur "Qizilqum"ga mag'lub bo'lishdi. Oxirgi ikki turda esa "Bunyodkor" faqat g'alaba qozondi. SHuhrat Maqsudov shogirdlari dastlab "Lokomotiv", so'ngra "Dinamo"ni bir xil 2:1 hisobida mag'lub etishdi.

Bugun bahs oldidan imkoniyatlar teng bo'lsa kerak. "Neftchi" bugun uyda ikkinchi bor yutishga harakat qiladi, o'z navbatida "Bunyodkor" ham ketma-ket ikkita g'alabadan so'ng to'xtab qolishni xohlamaydi. Bir so'z bilan aytganda, muxlislarni qiziq o'yin kutmoqda.

NEFTCHI – BUNYODKOR
Hakamlar: Akobirxo'ja SHukurullaev, Aleksandr Sidorov, Baxtiyorxo'ja SHavkatov, Akmal Rahimov
VAR hakami: Elyor Tursunov
VAR assistenti: Maksim Nexochin
VAR nazoratchisi: Valentin Kovalenko
Nazoratchi: Rashid Aytekov
Komissar: Oybek Yunusov