Bahodir Ibrohimov hayoti va faoliyatiga bag'ishlangan kitobning taqdimoti bo'lib o'tdi

Taniqli futbol jurnalisti Vladimir Safarovning Bahodir Ibrohimov faoliyatiga bag'ishlangan kitobining taqdimot marosimida keng futbol jamoatchiligi, futbol faxriylari, sport jurnalistlari qatorida, Bahodir Ibrohimovning oila azolari ishtirok etishdi.

Taqdimot marosimini kirish so'zi bilan ochib bergan O'FF Prezidenti Mirabror Usmonov Paxtakor klubi sobiq futbolchisi, murabbiy sifatida katta yutuqlarga erishgan Bahodir Ibrohimovning o'zbek futboli tarixida tutgan o'rni katta ekanini alohida qayd etdi. Bahodir Ibrohimov nafaqat futbolchi, balki murabbiy sifatida O'zbekistonda ham, undan tashqarida ham katta yutuqlarga erishgan va o'zbek futbolini jahonga tanitishda salmoqli hissa qo'shgan, - dedi Mirabror Usmonov.

Taqdimot marosimda shuningdek, kitob muallifi Vladimir Safarov, futbol faxriysi va taniqli teleboshlovchi Axbor Imomxo'jaevlar so'zga chiqib, Bahodir Ibrohimovning hayoti va yorqin faoliyati ko'pchilik uchun o'rnak bo'lishga loyiq ekanligini alohida takidlashdi.

Takidlash joiz, Bahodir Ibrohimov 1963-1973 yillar davomida Toshkentning Paxtakor klubida to'p surgan. Murabbiylik faoliyatini esa Farg'onaning Neftchi klubida katta murabbiy sifatida boshlagan Ibrohimov keyinchalik Dinamo (Samarqand) klubida davom ettirdi. Bahodir Ibrohimov keyinchalik Suriya yoshlar terma jamoalari, BAA hamda Saudiya Arabistoni klublarida katta yutuqlarga erishgan. Etiborlisi, Suriya o'smirlar hamda yoshlar terma jamoalarini ketma-ket ikki marta jahon chempionati final bosqichi o'yinlariga olib chiqqan ilk o'zbekistonlik murabbiyga aylangan.