Ayollar futboli: Terma jamoa Jahon chempionatiga tayyor ham, loyiq ham emas

Guruhdan bir amallab chiqqan qizlar keyingi ikkita o'yinda mag'lubiyatga uchrab, 2027 yilgi Jahon chempionati yo'llanmasidan quruq qoldi. To'g'ri, biz keyinroq xalqaro Konfederaciyalar o'tish turnirida ishtirok etamiz, lekin bundan ne foyda. Shunchaki yil oxirigacha turli safarlar, yig'inlar va o'rtoqlik o'yinlari o'tkazganimiz qoladi. Xalqaro o'tish turnirida nimanidir qoyil qilishimizga to'g'risi ishonch yo'q. Ishonch faqat Filippin bilan o'yinda bor edi, lekin u ham puchga chiqdi.

O'zbekiston ayollar terma jamoasi Avstraliyadagi Osiyo Kubogida beshta o'yin o'tkazdi. Natijalarni keltirib o'tamiz:

Shimoliy Koreya - O'zbekiston 3:0

Xitoy - O'zbekiston 3:0

O'zbekiston - Bangladesh 4:0

Janubiy Koreya - O'zbekiston 6:0

Filippin - O'zbekiston 2:0

Umumiy beshta o'yindan 4tasida mag'lubiyat va bir g'alaba. To'plar nisbati 4-14. Biz faqat futbol o'ynashni bilmaydigan Bangladeshni yutdik xolos. Chunki Bangladesh ayollar terma jamoasi guruhdagi hamma o'yinlarni yutqazdi, birorta ham gol ura olmasdan - uch o'yinda 11ta gol o'tkazib musobaqani tark etdik. Futbol o'ynashni biladigan davlatlar bilan tenma-teng o'ynay olmadik. Ochig'i, biz Osiyo chempionatida nimadir karomat ko'rsatib, JCHga borishga loyiq emasdik. Umuman biz Jahon chempionatiga hali tayyor emasmiz.

Agar Evropa ayollar jamoalari ishtirokidagi o'yinlarni ko'rmagan bo'lsangiz, ko'rishni maslahat beraman. Franciya, Angliya, Ispaniya - bular juda kuchli o'yin namoyish etadi. Hatto bazi uchrashuvlarga 20-30 minglab muxlis keladi. O'yin tempi nihoyatda baland, erkaklarnikidek tez va kurashlarga boy. Ochig'i, biz ularning darajasiga yaqin ham kela olmaymiz. Shuning uchun "ko'rpangga qarab oyoq uzat" maqoli bizga juda mos keladi va Jahon chempionatiga borilgan taqdirda shafqatsiz hisoblar bo'lishini tasavvur qila olamiz. Koreyadan 6ta gol o'tkazgan jamoa Franciyadan kamida ikki barobar ko'p o'tkazadi. Chunki bizning hozirgi darajamiz shu.

Etibor bering-a, FIFA JCH uchun Osiyoga 6ta o'rin bergan. Bu juda yaxshi ko'rsatkich. Eng qizig'i, yo'llanma uchun kurash Osiyo chempionatidan keyin ham davom etadi. Shu yilning noyabr-dekabr oylarida xalqaro Konfederaciyalar o'tish turnirining birinchi bosqichi, kelasi yil fevralda ikkinchi bosqich o'yinlari bo'lib o'tadi. Osiyodan O'zbekiston va Xitoy Tapeyi shu uchrashuvlarda ishtirok etadi. Bu degani ketdi yana yil oxirigacha o'quv-yig'inlar, oxiri ko'rinmaydigan safarlar...

Ushbu Osiyo chempionati terma jamoa bosh murabbiyiga haqqoniy bahoni berib bo'ldi. Litvalik Kotrina Kulbite amalda ishonchni oqlay olmadi. Mayli, futbolda doim yutish imkonsiz, bo'lib ham endi-endi tetapoya qilayotgan O'zbekistonda ayollar futbolini birdaniga kuchaytirib bo'lmaydi. Buni ham tushunamiz, ammo nuqul "suxoy" yutqazishni qanday qabul qilish mumkin. Shimoliy Koreya yopiq davlat, lekin negadir ularning qizlari yaxshi futbol o'ynaydi. Ular chetma-chet yig'in o'tkazmasa ham kerak. Biz gol o'tkazdikmi, tamom yutqazamiz. Yana bitta gol bilan kifoyalanib qolmaymiz, kamida ikkita bilan boshlab oltita bilan tugatamiz.

Ayollarga hurmatimiz cheksiz, lekin O'zbekistonda ayollar terma jamoasini erkak murabbiyi boshqarishi kerak degan fikrdaman. Ko'p davlatlarda ayollar terma jamoasini erkaklar boshqaradi va natijaga erishadi. Masalan, Osiyo chempionatini oylik. Musobaqa 12ta jamoa ishtirokida boshlanib, shundan 8tasi guruhdan chiqdi va chorak finalga yo'l oldi. 

Chorak finalda o'ynagan jamoalar murabbiylari:

Janubiy Koreya - Shin Sang Vu (erkak, fuqaroligi Janubiy Koreya)

Yaponiya - Nils Nielsen (erkak, fuqaroligi Daniya)

Filippin - Mark Torkaso (erkak, fuqaroligi Avstraliya)

Xitoy - Ante Milichich (erkak, fuqaroligi Avstraliya)

Xitoy Taypeyi - Prasobchoke Chokemor (erkak, fuqaroligi Tailand)

Avstraliya - Jo Montemurro (erkak, fuqaroligi Avstraliya)

Shimoliy Koreya - Ri Song Xo (erkak, fuqaroligi KXDR)

Ko'ryapsizmi, bizdan boshqa hamma jamoani erkak murabbiylar boshqarib kelmoqda. Chunki erkaklarda o'rgatish va bilim berishni ayollarga nisbatan ustun deb bilaman. Oddiy misol, maktablarda eng zo'r o'qituvchilar kim? Erkaklar. Mashina haydashni kim yaxshi o'rgatadi? Erkak kishi. Maydonda kim yaxshi hakamlik qiladi? Erkaklar. To'p tepishni kim yaxshi o'rgatadi? Erkak kishi. 

Taklifim - Kotrina Kulbitega rahmat aytib chiqish eshiklarini ko'rsatish lozim. Uning darajasini ko'rdik. Kotrina hali yosh va terma jamoa darajasida kuchli emas deb o'ylayman. Ehtimol u malaka oshirish uchun bironta ayollar klubini boshqargani maquldir. Lekin mamlakat ayollar terma jamoasiga hali ancha sayozlik qilar ekan. Ayollar terma jamoamizga erkak kishini, bo'lib ham tajribali va yoshi 45dan oshgan erkak murabbiyni tayinlagan maqul deb bilaman. O'zimizda ham bor shunday murabbiylar va ular ayollar jamoalarida yomon ishlamayapti. Qizlar mayli, to'p tepsin, yordamchi murabbiy bo'lsin, shifokorlik qilsin, ammo bosh murabbiy va darvozabonlar murabbiyi erkak kishining ishi.

X.Xoliqov