Aleksandr Geynrix: "Futbolda shoshib xatoga yo'l qo'ymaslik kerak"

"Terma jamoaga qaytganimdan xursandman. To'g'risini aytsam, muxlislarni o'zim ham sog'ingandim, golim ularga sovg'a bo'ldi deb o'ylayman. Birinchi o'yinda qiyin bo'ldi, gap raqibning kuchida emas, yangi murabbiy qo'l ostida bor-yo'g'i to'rt kun mashg'ulot o'tkazdik. Samvel Babayanning bizdan nimani talab qilayotganini to'liq anglab etish uchun biroz vaqt kerak. Keyingi o'yinlarda o'zimizni yanada yaxshi his qilishimizga ishonaman", - deydi Geynrix.

- Yamandan bugun kutilganidan ancha yaxshi harakat qildi. Bunday o'yinni ulardan kutganmidingiz?
- Bor etiborni himoyaga qaratishlarini bilardik. Bunday o'yinlarda biroz qiyin bo'ladi. Buning echimi tezkor gol, ammo biz birinchi bo'limda vaziyatlardan foydalana olmadik. Lekin bari yaxshilik bilan tugadi.

- O'ylashimizcha, bugun Yaman o'z saviyasidan bir kalla ustun o'ynadi, biz ham o'z imkoniyatimizdan yuqoriroq harakat qilishimiz mumkinmi?
- Mumkin albatta. Buning uchun shoshmaslik kerak, xato ko'p bo'ladi. Futbolchilarimiz minglab yig'ilgan muxlislar oldida tezroq gol urishimiz kerak deb shoshdilar. Aksincha, bunday ishlarni xotirjam bajarish kerak. SHunda unum bo'ladi. Ikkinchi bo'lim arafasida yoshlarga shuni takidladim. O'z navbatida Filippin bilan o'yinda yanada yaxshiroq harakat qilishga vada beramiz.