“Al Xor”dan taklif, “Surxon”ning bunga munosabati, Qatardagi maqsadlari borasida Baxtiyorjon Qosimov bilan suhbat

SHundan keyin, futbolchi bilan bog'lanib, saytimiz uchun intervyu oldik. 

- “Al Xor” klubiga o'tishim juda tez amalga oshdi. O'zim ham buni ochig'i kutmagandim. Aniqrog'i, yangi klubga ko'chib o'tishim 3 yoki 4 kun ichida hal bo'ldi. “Surxon” klubi vice-prezidenti Jahongir aka Usmonov menga Qatardan taklif bo'layotganini aytdi hamda menga tanlash imkoniyatini taqdim qildi. Buning uchun u insonga minnatdorchilik bildiraman. “Al Xor” klubiga o'tishim aynan shu inson tufayli amalga oshdi. 

- Jamoa bilan qancha muddatli shartnoma imzoladingiz?

- SHartnoma muddatim 1 yilga mo'ljallangan. 

- Qatardan taklif bo'lganidan keyin “Surxon” klubidagilar qarshilik qilishmadimi?

- Yo'q. Ular bu taklifni qabul qilishimga hech qanday to'siq bo'lgani yo'q. Buning uchun klubdagi barcha mutasaddilarga minnatdorchilik bildiraman. 

- “Al Xor” klubi sizni qanday kutib oldi?

- Klub juda ham professional. Ajoyib tarzda kutib olishdi. Bundan g'oyat xursandman.

- Qatarga yo'l olishingizning asosiy sababi bu moliyaviy tomonlama yaxshi taklif bo'lganimi?

- Bilasizmi, klub o'z oldiga yuqori maqsadlarni qo'ygan. Yani, yana Qatar Yulduzlar ligasiga qaytishni vazifa qilgan. Qolaversa, rejalari menga juda maqul keldi. Bu esa men uchun hayotimdagi katta burilish vazifasini o'taydi. Legioner sifatida to'p tepishni orzu qilardim va bunday imkoniyat paydo bo'lganidan keyin, undan foydalanishga qaror qildim. Bundan tashqari, moliyaviy tomonlama ham yaxshi taklif bo'ldi. 

- Jamoa sizga alohida kvartira berdimi?

- Hozircha mehmonxonada istiqomat qilib turaman. Yaqin orada jamoa Turkiyaga o'quv-yig'in mashg'ulotlarini o'tkazishga uchib ketiladi. Safardan kelganimizdan keyin, shartnomada ko'rsatilganidek, jamoa menga alohida uy va mashina taqdim qiladi. 

- “Al Xor”ning quyi ligada ishtirok etishi taklifni qabul qilish vaqtida sizni o'ylantirmadimi?

- O'tgan mavsum jamoa to'plar hisobiga quyi ligaga tushib ketgan. Biroq yana Yulduzlar ligasiga qaytish vazifasi borligi meni qiziqtirdi va o'zimni ko'rsatish imkoniyati paydo bo'ldi. SHu sababli taklifni uzoq o'ylab o'tirishdan mano yo'q edi. Xudo xohlasa, jamoaga bejiz kelmaganimni isbotlamoqchiman va “Al Xor”ning elitaga qaytishiga o'z yordamimni berishni istayman.