Dastlab, o'sha qarorga reakciya bildirdim: buyurtmachilar yashirilmasin, keskinroq jazolansin, o'z-o'zidan bu mavsumning yakuniy natijalariga ta’sir ko'rsatishi kerak.

O'yladimki, shundagina adolat qaror topadi (Bu fikr to'g'ri edi). Ammo negadir atrofimdagi tajribali kishilar miyig'ida kulib qo'yishdi. Nega? Chunki, ular bunday bo'lishiga ishonmaydi.

Ahmoqmi bular, hamma narsa oyday ravshan-ku, deb o'pkalagan bo'ldim. Foydasiz, birovdan sado chiqmadi, hech kim yozmadi.

Faqat mas'ullardan signal keldi: To'g'ri va o'rinli fikrlar uchun rahmat, lekin sen voqealar rivojidan ilgarilab ketding. Barchasi bo'ladi, hamma o'ziga loyig'ini oladi - bu murakkab jarayon bo'lib, ko'p vaqt talab qiladi.

Xursand bo'ldim, quvondim. Demak, hali jarayon davom etayotgan ekan, klubdagilar parda ortidan chiqariladi va bunga ishonmaganlar uyalib qoladi. Har tong uyg'onishim bilan O'FA rasmiy kanaliga qaraydigan bo'ldim, biror yangilik umidida...

Kecha Farg'onadagi Istiqlol stadioni Neftchi va Andijon o'rtasidagi o'tish o'yiniga mezbonlik qildi, burgutlar ligada qolishdi. Ilgiz Tantashev final hushtagini chalgan mahalda barcha umidlar o'ldi, endi befoyda. Endi qaysidir jamoadan ochko ayrilishiga, pastga tushirib yuborilishiga o'zim ham ishonmayman.

Soddalik bilan o'yinni sotib olgan klublar jazolanishi haqida o'ylabman. Turnir jadvali o'zgarib ketishi haqida o'ylabman. Shunday holatda quyi ligaga tushib ketgan Buxoroning asl o'rni yuqoriroqda ekani haqida o'ylabman. Kalchopolini eslab, o'zimizda ham takrorlanishi haqida o'ylabman...

Shu masalada qaysi jurnalist bilan gaplashsam, hammasi bir xil javob qaytardi: Endi, uka, bu Italiya emas. Aslida gap bunda emas, haqiqat bu emas. Asl muammo sizning italyan emasligingizda!

Kalchopoli haqida 1000 marta yozdim (havasim kelganidan), yana bir martasi zarar qilmaydi. O'shanda dalillar bazasi Turin, Rim va Neapol sudlariga yuborilgan, lekin 2 yil davomida hech kim ijobiy javob qaytarmagan. Shundan keyin ma'lumotlar OAVga sizdirilgan hamda jamoatchilik Italiya futbol federatsiyasidan aybdorlarni topib jazolashni talab qilgan, ana shu jarayonni nazorat qilgan. Kalchopoli hech qachon sodir bo'lmas edi, agar jamiyat faol bo'lmasa.

Yuqoridagi 3 ta gapni takrorlayverishdan charchadim, birovga tushuntirolmay charchadim. Bu gal ham faqat hakamlar jazolansa, stadionga tushish uchun bilmam qanday asos topa olaman. Qayerdasiz, futbolsevarlar? Qayerdasiz, halol futbol tarafdorlari? Qayerdasiz, ustoz jurnalistlar?

Faxriddin Ro'ziev, O'zJOKU talabasi

Tantashevning hushtagi umidlarni o'ldirdi