Aynan u "So'g'diyona"ning Superligadagi birinchi golini urishga muvaffaq bo'ldi. Bundan tashqari Superliganing 8-turida"Qo'qon-1912" bilan bahsda Azimov jamoasiga bir ochko keltirgan golga mualliflik qildi. Biz yarim himoyachi bilan mavsum starti haqida suhbatlashdik.

- Bu yilgi mavsum "So'g'diyona" uchun ijobiy boshlanmadi...
- To'g'ri, mavsum biz uchun u qadar ko'tarinki ruhda boshlanmadi. Dastlabki turda Toshkentda "Paxtakor"ga yutqazdik, keyin o'z maydonimizda Farg'onaning "Neftchi" klubi bilan durang qayd etdik. Biz o'ylagan rejalar amalga oshmadi. O'zimizni qiyin ahvolga tushirib qo'ydik. Shu bois mavsum biz o'ylagadek boshlanmadi. Ammo sekin-asta ijobiy natijalarni qo'lga kiritishni boshladik.

- Mochinovga nima etishmadi deb o'ylaysiz?
- Aleksandr Mochinovni yoshligimdan buyon taniyman. U "Bunyodkor" akademiyasida ham murabbiyim bo'lgan. Mochinov oliy ligada ko'p ishlamagani uchun tajriba etishmadi deb o'ylayman. Ammo "So'g'diyona" uchun borini berdi, borini berib ishladi. Fursatdan foydalanib ushbu murabbiyga rahmat aytaman, bu insondan juda ko'p narsa o'rganganman.

- Jizzaxlik muxlislar haqida qanday fikrdasiz?
- Juda talabchan. Jizzaxlik muxlislar har bir o'yinni qoldirmay kelishadi. "Neftchi" bilan kuchli shamol bo'ldi, "Metallurg" bilan kubok doirasidagi bahs kuchli yomg'ir ostida o'tdi. Shunga qaramay muxlislarimiz stadionga kelib bizni uchrashuv oxirigacha qo'llab turishadi. Shunday jonkuyar muxlislari bor jamoada o'ynayotganimdan xursandman.

- Sergey Lushan bilan "Bunyodkor"da ham ishlagansiz. U "So'g'diyona"da birinchi navbatda nimani o'zgartirdi?
- O'zimizga ishonishimiz kerakligini o'rgatdi. Bizni qo'llab quvvatladi. O'zimizga ishonishimizni bot-bot takrorladi. Bizning o'yinimizni anchadan buyon kuzatib yurgan ekan. Aynan ishonch yo'qligi bois bir nechta o'yinlarda yutqazganimizni aytib o'tdi.

- Superligadagi o'zgarishlar haqida fikringiz...
- O'zgarishlar haqida fikrim ajoyib, juda ajoyib. Ayniqsa SPORT telekanalida o'yinlarni jonli olib berilishi ajoyib yangilik bo'lmoqda. Mana mart oyining eng yaxshilari taqdirlandi. Har oyda futbolchilar men ham shu sovrinni olaman deb harakat qiladi, o'sish bo'ladi. Oldingi sovrindor esa buni o'zida saqlab qolishga intiladi.

- "So'g'diyona" - "Navbahor" uchrashuvi haqida so'ramasak bo'lmaydi. Bunday g'alaba qanday qo'lga kiritildi?
- Ushbu o'yinga 2 kun qolganida Sergey Lushan jamoani qabul qilib olgandi. Shu ikki kun ichida murabbiy o'zimizga bo'lgan ishonchni qaytarib berdi. Tanaffus chog'ida murabbiy quyidagi sehrli so'zlarni aytdi: "0:2 bu hali mag'lubiyat emasligini, jamoalar bunday natijadan keyin 3:2, 4:2 hisobida yutib ketgan. O'zingizga ishoning va futbol o'ynanglar". Shu so'zlardan so'ng biz ikkinchi taymda irodali g'alabaga erishdik.

- Mavsumning dastlabki turlarida o'zini ko'rsatgan futbolchilar kimlar?
- Menimcha Superligada hamma futbolchi o'zini yaxshi tomonlama ko'rsatmoqda deb o'ylayman. Barcha o'zining borini berib o'ynamoqda.

- Bu mavsum uchun Sardorbek Azimovning shaxsiy maqsadi qanday?
- Mavsumdagi maqsadlarim yuqori. O'z vazifamni alo darajada bajarish. Qanot yarim himoyachisi nima qilishi kerak? Hujumchilarga golli vaziyatlar yaratib berishi lozim. Shunday ekan hujumchilarni ko'proq qulay vaziyatlarga chiqarishga urinaman.

- Evropa chempionlar ligasida finalga qaysi klublar chiqadi deb o'ylaysiz?
- O'zim "Real Madrid"ga muxlislik qilaman. Bu yilgi finalga aynan Madrid klubi chiqadi deb o'ylayman. Nasib qilsa "Real" ketma-ket uchinchi marta ushbu sovringa ega chiqadi va o'ziga xos "xet-trik" qayd etadi. Menga qolsa "Liverpul" finalga chiqsa yaxshi bo'lardi. Chunki hamma bu yil "Liverpul" chempion bo'ladi demoqda. Shu bois finalga chiqsin finalda "Real" mag'lub etsin. Shunda hamma tan beradi Zidan jamoasiga.

- Jahon chempionatida kimga muxlislik qilasiz?
- Bu yil mundialda Portugaliyaga muxlislik qilaman. Ronaldu boshchiligidagi jamoa Jahon chempionatida ham munosib ishtirok etsa kerak.

Narzulla Saydullaev suhbatlashdi

Sardorbek Azimov: "Lushan o'zimizga bo'lgan ishonchni qaytardi"