Mutaxassislar "Qizilqum"ni har doim o'ziga yaratilgan sharoitlar darajasiga munosib o'ynamaslikda ayblashadi. Joriy mavsum ham shunday boshlandi. Nesterov, To'xtaxo'jaev, Boydullaev, Grigalashvili hamda Vatsadze singari tajribali futbolchilarni yig'ib olgan jamoa FIFA kunlari tufayli yuzaga kelgan tanaffusga 8 o'yinda 10 ochko to'plagani holda chiqib ketdi.

Biroq, "Qizilqum"ning tanaffusdan qaytishi dahshatli ko'rinishda bo'ldi. Agar bu haqda bir film olinsa, Hamidjon Aktamovning stadionga kirib kelish sahnasiga Gyokhan Kirdar tomonidan 2003 yilda "Qashqirlar makoni" teleseriali uchun ishlab chiqilgan maxsus musiqa juda mos tushardi:)

Tanaffusdan keyin o'tkazilgan o'yinlargina hisoblansa, navoiyliklar musobaqa jadvalida 1-o'rinni band qilishadi ("Paxtakor" bilan). FIFA kunlariga qadar o'tgan 8 turda 10 ochko yig'ishni amallagan "Qizilqum"ga tanaffusdan keyin shuncha ball olish uchun 4 ta bahs kifoya qildi. Raqiblar orasida AGMK, "Bunyodkor" singari jamoalarning borligi holat tasodif emasligini tasdiqlaydi.

Xo'sh, "Qizilqum"da nima o'zgardiki, natija birdan yaxshilanib ketdi?

Birinchidan, bu bevosita jamoa ustozi bilan bog'liq holat. Hamidjon Aktamovning faoliyatiga nazar solsangiz, asosan bir xillikka guvoh bo'lasiz: 4-2-3-1 yoki 4-1-4-1. Biroq, mazkur mutaxassis tanaffusdan keyin mutlaq yangicha o'yin uslubi bilan qaytdi va o'z faoliyatida kichik inqilobni amalga oshirdi.

Gap shundaki, Aktamov faoliyatida ilk bor 3 nafar markaziy himoyachi bilan o'ynay boshladi. Yangi taktik sxema "Surxon"ga qarshi 18 iyunda o'tkazilgan o'yinda ish bermagan bo'lsa-da (durang), oradan 4 kun o'tib Olmaliq mag'lub qilinishida asqotdi.

AGMK bilan o'yinni bevosita stadiondan kuzatdim va ochig'i, o'sha kuni "Qizilqum"ni tanib bo'lmasdi. Nesterovning ishonchli o'yini, To'xtaxo'jaevning 2 yonidagi Qambarov va Tolmasovni to'g'ri yo'naltirib turishi, 2-yoshligini yashayotgan Boydullaev va oldingi chiziqdagi gruzinlar...

Bu g'alabani tasodif sifatida baholaganlar etarlicha edi. "Qizilqum"ning ularga javobi yana 4 kundan keyin berildi. Bu gal poytaxtning "Bunyodkor"i Navoiydan egik bosh bilan qaytdi.

2 iyul kuni o'tkazilgan "Mashal"ga qarshi bahsda esa markaziy himoyachilar soni 2 taga qaytarildi. Bunda joriy mavsum Muborak klubining hujumdagi ishlari yurishmayotgani inobatga olingan bo'lsa ajab emas. Nima bo'lganda ham, tanlov o'zini oqladi. Yakunda darvozasi dahlsizligini saqlab qolgan "Qizilqum" mavsumdagi 5-g'alabasini nishonladi.

Xullas, tanaffusdan keyin 4 o'yinda 10 ochko yig'gan Navoiy jamoasi turnir jadvalida 5 pog'onaga yuqoriladi. Va so'nggi 1 oy ichidagi eng katta progressni qayd etdi. "Qizilqum" bilan bu borada faqat "Paxtakor" bahslashishi mumkin.

Boydullaev effekti!

To'g'ri, jamoa o'yinini Aktamov va Agamurodov yaxshi tomonga o'zgartiryapti. Lekin, tanaffusdan keyingi "Qizilqum"ni Erkin Boydullaevsiz tasavvur qilish mumkin emas. Samarqandlik futbolchi oxirgi bir oyda haqiqiy "yirtqich"ga aylandi va ehtimol faoliyatidagi eng yaxshi davrni boshdan o'tkazyapti. Etibor qiling, Erkin Boydullaev so'nggi 4 o'yinning barchasida raqiblari darvozasiga yo'l topdi (2 bor jarimadan, 1 gal burchak zarbasidan). Uning gollari bo'lmasa, "Qizilqum" 5 ochko yo'qotib, ayni paytda turnir jadvalining 8 yoki 9-pog'onasini egallab turgan bo'lardi. Eslatib o'tamiz, samarqandlik futbolchi 37 yoshda!

Transfer oynasi

Ha, "Qizilqum"ning oxirgi o'yinlari chempionatda intrigani oshirdi. Jamoa Superliganing joriy mavsumida eng kam mag'lub bo'lgan va eng oz to'p o'tkazib yuborganlardan biri. Biroq, o'zbek futbolining bir dardi borki, har yoz bezovta qilib turadi. Yani, transfer oynasi ochilishi bilan klublarimizning jamoa asosini tashkil qilib turgan 10-15 nafar futbolchidan birdaniga voz kechib yuborishi ortiq taajjublanarli holat emas. Shu yuzdan Navoiyda tuzilayotgan raqobatbardosh jamoaning har tomonga tarqashidan xavotir olayotganlar bo'lsa kerak. Bizdagi malumotlarga ko'ra, unday bo'lmaydi. Yozgi transfer darchasida "Qizilqum"ni faqat 2 nafar futbolchi tark etishi mumkin: Oybek Qilichev va Mate Vatsadze. Shuningdek, jamoa tarkibi oxirgi 6 oyni Janubiy Koreyada o'tkazgan Islom Kenjaboev bilan kuchaytirildi.

Xullas, "Qizilqum"ning tanaffusdan keyingi porlashi navoiylik muxlislarni xursand qilgani bor gap. Umid qilamizki, bu yurish davomli bo'ladi...

Xorazmdan chiqqan millioner

"Qashqirlar makoni"dagi Aktamov yoxud "Qizilqum"ning favqulodda porlashi