Shu paytgacha qita birinchiligi yo'llanmasini qo'lga kiritgan jamoalar soni 17 ta edi. 14 oktyabr kuni bo'lib o'tgan saralashning uchinchi bosqich 4-tur uchrashuvlaridan so'ng yana bir jamoa - Suriya ham Osiyo Kubogi yo'llanmasiga ega bo'ldi. Suriya terma jamoasi 9 va 14 oktyabr kunlari Myanmaga qarshi ikkita o'yin o'tkazib, har ikkalasini o'z foydasiga hal etdi – 5:1, 3:0.

Natijada saralash o'yinlari tugashiga ikki tur qolganida 12 ochko bilan muddatidan oldin vazifani bajardi. Malumot uchun, Osiyo Kubogi-2027ning oxirgi saralash bosqichida 24 ta jamoa qatnashyapti va jamoalar to'rttadan 6 guruhga bo'lingan. Saralash reglamentiga ko'ra, har bir guruhdan faqat bitta jamoa qita birinchiligiga yo'l oladi. Shu bois ham bitta o'rin uchun kurash oxirigacha kechadi.

Osiyo Kubogiga mezbon Saudiya Arabistonidan tashqari chiqqan jamoalar: Avstraliya, Iroq, Eron, O'zbekiston, Qatar, BAA, Yaponiya, Koreya, Ummon, Falastin, Bahrayn, Iordaniya, Xitoy, Indoneziya, KXDR, Kuvayt, Qirg'iz Respublikasi, Suriya.

Shnday qilib, musobaqa ishtirokchilari soni jami 19 taga etdi va qolgan 5 ta yo'llanma egasi 18 noyabr hamda kelasi yilning 31 mart kuni bo'lib o'tadigan o'yinlaridan so'ng malum bo'ladi. Bu saralashning eng oxirgi bosqichi hisoblanadi.

4-turdan so'ng o'z guruhlarida peshqadamlik qilayotgan jamoalar:

Filippin – 12 ochko
Livan – 10 ochko
Gonkong – 8 ochko
Turkmaniston – 9 ochko
Suriya – 12 ochko
Malayziya – 12 ochko

Saralashning "A" guruhida ishtirok etayotgan Tojikiston agar keyingi ikkita o'yinda g'alaba qozonmasa, Osiyo chempionatiga chiqa olmasligi mumkin. Hozircha bu guruhda Filippin peshqadamlik qilyapti. Tojikiston oxirgi turni o'z maydonida aynan Filippinga qarshi o'tkazadi va shu o'yinda barcha masala hal bo'lishi mumkin. Eslatib o'tamiz, safarda kechgan birinchi davra bahsida 2:2 hisobi qayd etilgandi.

P.S. Saralashning 5-tur uchrashuvlari 18 noyabr kuni bo'lib o'tadi:

Sharqiy Timor – Tojikiston
Maldiv orollari – Filippin
Bruney – Livan
Yaman – Butan
Gonkong – Singapur
Bangladesh – Hindiston
Shri Lanka – Tailand
Turkmaniston – Xitoy Taypeyi
Pokiston – Suriya
Afg'oniston – Myanma
Nepal – Malayziya
Laos – Vetnam

Xayrulla Xoliqov

Osiyo Kubogi-2027. Qita birinchiligiga chiqqan jamoalar 18 taga etdi