Toshkentdagi "To'qimachi" stadioni bugun mamlakat kubogi birinchi bosqich doirasidan o'rin olgan "Oq-tepa" va "Zomin" uchrashuviga mezbonlik qildi. Bahs davomida to'pni nazorat qilish va havfli vaziyatlar yaratish bobida raqibidan ustun kelgan Toshkent klubi 2:0 hisobida g'alaba qozondi. Bellashuvdan so'ng "Oqtepa" bosh murabbiyi Aleksandr Ejov fikrlari bilan o'rtoqlashdi.

"O'yin haqida nima deyishim mumkin? Uch oylik tanaffusdan so'ng yana yashil maydonga qaytdik. Rasmiy uchrashuv bilan nazorat o'yini o'rtasida farq katta bo'ladi. Shogirdlarimga ajoyib o'yin uchun rahmat aytaman. Jamoamiz birinchi bo'limda qiynaldi. Boisi raqib chuqur himoyalandi va bizga bo'sh hududlar qoldirmadi. Umuman olganda etarlicha qarshilik ko'rsatdi. Karantinda juda ko'p vaqtni yo'qotdik. Muhimi futbolchilar kubok bahsiga yaxshi tayyorgarlik ko'rishdi va qo'ldan kelgancha tiklanishdi. Mantiqan olib qaralsa jamoamiz jismoniy jihatdan yuz foiz tayyor emas. Ayrim o'yinchilar bugun charchab qolishdi. Menimcha, bugun tajriba va mahorat o'z so'zini aytdi. To'g'ri takidladingiz transferlar vaqtida nomdor va Superliga havosini ko'rgan futbolchilarni qo'shib oldik. Bu esa foyda keltirishi aniq.

Ha, hisobni ochishga qiynaldik. Birinchi rasmiy uchrashuv bo'lgani uchun futbolchilarda hayajon va bosim bo'ldi. Vaqtliroq gol urishimiz mumin edi. Ko'p havfli vaziyatlar yaratdik. To'p darvoza ustuniga tegdi, darvoza yonidan o'tib ketdi. To'g'ri, bu bellashuvga qadar "Bunyodkor"ni o'rtoqlik uchrashuvida yutgandik. Unda havo harorati to'p tepishga qulayligi bois ortiqcha muammoga uchramagandik. Bugun esa havo juda issiq edi. "Zomin" jamoasi menda iliq taassurot qoldirdi. Oxirgacha kurashishdi. Bizni so'ngi daqiqaga qadar bosimda ushlab turishdi. Raqib safidagi yosh futbolchilarda ishtiyoq kuchli ekan",- deydi Aleksandr Ejov.

"Oq-tepa" bosh murabbiyi Aleksandr Ejov: "Birinchi rasmiy uchrashuv bo'lganligi bois futbolchilarda hayajon kuchli bo'ldi"