Raqib nom jihatdan kuchsiz sanalgan O'mon. Oldin ham aytganman raqibni biz qog'ozda yutib bo'ldik. Lekin unutmaslik kerakki bu yurt vakillariga qarshi kechgan so'nggi uchrashuvlarda anchagina ter to'kishimizga to'g'ri kelgan. Quyida shu haqida gap boradi.

O'zaro o'yinlar

Jamoalar shu kungacha turli darajadagi musobaqalarda jami 6 marotaba o'zaro to'qnash kelishgan. Siz uchun qiziq tuyulishi mumkin, lekin bu o'yinlarda ustunlik O'mon tarafida, 4 g'alaba. "Oq bo'rilar" esa 2ta o'yinda g'alabani o'z tomoniga og'dira olgan. To'plar nisbati 9-9. Bu jamoa bilan ilk uchrashuvimiz 21 asr boshiga to'g'ri keladi. O'shanda "Paxtakor" stadionida kechgan JCH-2002 saralash bosqichidan o'rin olgan bahsda O'zbekiston 5:0 hisobida g'alaba qozongan va bu g'alaba O'mon bilan o'yinlardagi eng yirik yutug'imiz ham shu bo'lgan. Har qanday davrda O'mon O'zbekiston uchun jiddiy raqib sifatida gavdalangan.

08.09.2001. O'zbekiston - O'mon 5:0

13.10.2001. O'mon - O'zbekiston 4:2

20.08.2008. O'mon - O'zbekiston 2:0

27.05.2014. O'zbekiston - O'mon 0:1

29.05.2014. O'zbekiston - O'mon 0:1

09.01.2019. O'zbekiston - O'mon 2:1

To'purarlar

O'monga qarshi uchrashuvlarda Mirjalol Qosimov va Jafar Irismetov 2tadan to'p kiritishgan. Maksim Shackix, Fevzi Davletov, Odil Ahmedov, Eldor Shomurodov hisobida 1tadan gol bor. Bitta gol avtogol sifatida qayd etilgan (Nabil Ashur). Bugungi uchrashuvdan so'ng to'purarlar ro'yxati yana kengayishi mumkin.

Mirjalol Qosimov 2

Jafar Irismetov 2

Maksim Shackix 1

Fevzi Davletov 1

Odil Ahmedov 1

Eldor Shomurodov 1

O'mon haqida

O'mon terma jamoasini xorvatiyalik tajribali murabbiy Branko Ivankovich boshqarmoqda. Ushbu mutaxassis 2020 yilda "qizil-oqlar"ni qabul qilib oldi. Uslub tomonlama raqibimiz Ivankovich qo'l ostida barcha uchrashuvlarda 2ta hujumchi taktikasini qo'llamoqda. Al Subhi (7-raqam), Al Alavi (17-raqam) oldingi chiziqda juftlik hosil qiladi. Faqatgina yarim himoyadagi taktik joylashuvlar o'zgarmoqda. Gohida 4-4-2, goxida 4-3-2-1 taktikasida harakatlanyapti. Bugun ham ular garchi mezbonlarga qarshi o'ynasa ham 2ta hujumchi taktikasini o'zgartirishmasligi aniq. Jumboqli tomoni yarim himoyachilarning joylashuvi. Aynan shu jihat chalg'ituvchi holat bo'lishi mumkin. O'mon to'p nazorati borasida o'yinda katta ustunlikka ega bo'ladi deyish qiyin. Chunki so'nggi 4ta o'yinda jamoa o'rtacha 38 foiz to'pga egalik qilgan. Zarbalar ko'rsatkichi har bir o'yinda o'rtacha 10ta, shundan faqatgina 4tasi darvozaga aniq borgan. Deylik Saudiya Arabistoni bilan uchrashuvda 2 bor aniq zarba yo'llangan va bu o'yinda O'mon 2:1 hisobida g'alaba qozongan. Katta ehtimol bilan bugun ochiq futbol ko'rmaymiz, degan taxmindaman. Lekin mezbon, muxlislar faktori O'zbekistonni oldinga o'tishiga, ko'proq vaziyatlar yaratishiga majbur qiladi.

So'nggi uchrashuvlardagi natijalari

O'mon - Livan 2:0

Iroq - O'mon 3:2

Baxrayn - O'mon 0:1

Saudiya Arabistoni - O'mon 1:2

O'mon - Yaman 3:2

Ma'lumot uchun uchrashuv bugun "Bunyodkor" stadionida 20:30da start oladi

O'mon O'zbekiston uchun qanday raqib?