Қарши шаҳридаги "Геолог" стадионида ўтказилган мазкур ўртоқлик баҳсида муросасиз кураш кечди ва унда меҳмонлар 2:1 ҳисобидаги ғалабани қўлга киритишди.
Учрашувда ҳисоб биринчи бўлимдаёқ очилди, аниқроғи, 32-дақиқада нукусликлар аъзоси Иззатулла Қуттибоев ўз жамоасини олдинга олиб чиқди. Бироқ мезбонлар бунга тезда жавоб қайтаришга муваффақ бўлишди ва орадан бор-йўғи икки дақиқа ўтиб, 34-дақиқада "Насаф" вакили Юсуф Отубанжо мувозанатни тиклаб, ҳисобни 1:1 кўринишига келтирди.
Ўйиннинг асосий қисми дуранг билан давом этаётган бир вақтда, баҳс якунланишига саноқли дақиқалар қолганида, яъни 85-дақиқада "Арал" футболчиси Сейдабулла Ниетуллаев рақиб дарвозасини ишғол қилиб, нукусликларга ғалаба келтирган муҳим ва ҳал қилувчи гол муаллифига айланди.
