Birinchi davrani jarohat sabab o'tkazib yuborgan futbolchi ikkinchi davrani olmaliqliklar safida boshlashi kutilayotgan edi. Biroq u "Lokomotiv" tanlovida to'xtadi. Bu borada Murodjon Toshmatovning fikrlariga quloq tutdik.

- OKMK jamoasida 2019 yildan beri o'ynab kelayotgan edingiz. Jamoani tark etishingizga jarohat sabab bo'ldimi yoki ketish vaqti kelganmidi?

- Birinchi o'rinda, OKMK oilasiga katta rahmat aytmoqchiman. Yaxshimi-yomonmi, 5 yilga yaqin shu jamoa bilan birga bo'ldim. Jarohatim sababmi yoki risqim shu kunga yozilgan ekan, nima ham derdim. Hammasi Xudodan. Jamoaga qo'limdan kelganicha yordam berishga harakat qildim. Meni qo'llab-quvvatlagan barchaga tashakkur.

- Mirjalol Qosimov ikkinchi davraga tayyorgarlik vaqtida sizni o'z rejalariga kiritganmidi, ketish qarori tasodifan yuz bermagan bo'lsa kerak?

- Balki Mirjalol Qosimovning rejalariga kirmagandirmiz. Bilsangiz, tarkib bilan bog'liq limit belgilangan. Shu sabab jamoani tark etdim.

- "Lokomotiv" Pro ligada o'ynaydi. Bu foydalimi yoki aksincha? "Lokomotiv" varianti qachon paydo bo'ldi?

- Men uchun quyi ligada o'ynash birinchi marotaba hisoblanmaydi. 2011/12 yilgi mavsumda quyi ligada to'p tepganman. U vaqtlarda eslasangiz Pro liga degan narsa yo'q edi. Oddiy Birinchi liga, deb yuritilardi xolos. 2012 yil "So'g'diyona" bilan chempion sifatida elitaga yo'llanma olgan edik. "Lokomotiv" ketishimni eshitgan zahoti aloqaga chiqdi. Bunga qadar "Dinamo" ham o'z safida ko'rishni istayotgandi. Lekin oilaviy sabablarga ko'ra "Lokomotiv" variantini tanladim.

- OCHLda o'ynaydigan jamoani Superligaga chiqish uchun kurashayotgan jamoaga almashtirdingiz. Bu kimning tavsiyasi bilan amalga oshdi?

- Bilasizmi, jarohat olganingizdan keyin ko'p jamoa sizga ishonmas ekan. Shu sababli sport formamga kirib olib, yana Superligada o'ynashga intilaman. To'g'risi, 1 yil katta futbolsiz qolib ketdim. Bu futbolchi uchun ko'p muddat. Hammasi yaxshilikka, deb o'ylayman.

- Umuman, jarohat olgan vaqtingizda futbolni tugatish xayoli keldimi? Aytganingizdek, jarohat olgan futbolchini hamma ham qabul qilishi qiyin. "Lokomotiv" murabbiylari bilan bu borada gaplashdingizmi?

- Tugatishni o'ylaganim yo'q. Xudoga tavakkal qilib yana kuchli bo'lib qaytish uchun harakat qildim. "Lokomotiv" murabbiylarining o'zi istagani ham katta rol o'ynadi. Jarohatdan qaytganimni bilishadi. Menga bildirilgan ishonchni oqlash uchun bor kuchimni ishga solishga tayyorman. "Lokomotiv" bilan 11 yil oldin "So'g'diyona"da amalga oshirgan ishimni yana takrorlashni, chempion bo'lib, jamoa bilan kuchlilar safiga qaytishni istayman.

"Jarohat olgan futbolchiga ko'p jamoa ishonmaydi" - Murodjon Toshmatov nima uchun "Dinamo"ni emas, "Lokomotiv"ni tanladi?