Shiddatli kechgan o'yinda maydon egalari 3:2 hisobidagi g'alabani tantana qildi. Ushbu bahsdan so'ng "Bunyodkor" himoyachisi Islom Qobilovning fikrlariga quloq tutdik.

"Avvalo g'alaba bilan jamoamizni va muxlislarni tabriklayman. O'yinga keladigan bo'lsak, bunday derbilarga ortiqcha tayyorgarlikning hojati yo'q. Bunday pallada futbolchilar shundoq ham o'zlarining eng yaxshi o'yinlarini ko'rsatishmoqchi bo'lishadi. Mazkur uchrashuvdan oldin "Buxoro"ga qarshi maydonga chiqqan edik, shu bois "Paxtakor" bilan kechadigan o'yinga tayyorgarlik uchun vaqt ham yo'q edi. Birinchi davradagi mag'lubiyat uchun ham borimizni berib harakat qildik",- deydi Islom Qobilov.

- O'tgan mavsumda ham "Bunyodkor" o'z maydonida xuddi shunday natija qayd etgan edi. Nima deb o'ylaysiz, futbolchilarning kuchli raqiblarga qarshi boshqacha ishtiyoq bilan maydonga chiqishi ruhiyat bilan bog'liqmi?

- Albatta, ruhiyat bilan bog'liq desam ham bo'ladi. Biz shunchaki murabbiyimizning ko'rsatmalarini katta ishtiyoq bilan bajardik va "Bunyodkor"ning shani uchun o'ynadik.

- Jamoa hisob tenglashgan vaqtda ham bosiqlik va sovuqqonlik bilan harakat qildi. Aynan shu omil avvalgi uchrashuvlarda etishmayotgandi...

- To'g'ri, o'tgan turlarda bizga bu narsa ham etishmayotgan edi. Avvalgi o'yinlardagi xatolarni takrorlamaslikka harakat qildik.

Abdulaziz Iskandarov yozib oldi.

Islom Qobilov: "Bunyodkor"ning shani uchun o'ynadik"