Futbolchilar ro'yxatini o'ntadan besh qismga bo'ldik. To'g'risini aytsam, bu reytingni berish o'zimga ham qiziq ko'rindi, har holda biz Osiyoda yashaymiz, shunday ekan sayt xodimlarining qitamiz futbolchilari haqida fikrlari hurmatga loyiq.

Reytingni berib borish chog'ida kuchli o'ntalikda kimlar bor ekan degan savol meni ham qiziqtirib qo'ygani rost, ammo birdaniga o'tib ketmay sabr qildim va ko'pchilik o'quvchilar qatori eng kuchlilar bilan navbatma-navbat tanishib bordim.

Avvalo shuni aytish kerak, mazkur reyting Yevropa futboliga qiyosan 2017-2018 yilgi mavsum yakunlariga ko'ra tuzilgan. Ma'lumki, ko'p joylarda chempionat, kubok o'yinlari va boshqa xalqaro musobaqalar kuz-bahor tizimida o'tkaziladi. Shu bois reyting tuzilayotganda mana shu jihat alohida e'tiborga olingan bo'lsa kerak. Fourfourtwo.com shu va shunga o'xshash reytinglarni ko'p tuzadi. Ular Osiyo futboliga bee'tibor emas va doim qiziq narsalarni berib borishga harakat qilishadi.

Endi sayt versiyasi bo'yicha Top-50ga qaysi davlatdan nechta futbolchi kiritilganini sanab o'tsak.

Yaponiya - 16
Eron - 9
Janubiy Koreya - 7
Avstraliya - 5
Saudiya Arabistoni - 4
BAA - 2
Suriya - 2
O'zbekiston - 1
Tailand - 1
KXDR - 1
Qatar - 1
Xitoy - 1

Ko'rib turganigizdek, eng ko'p futbolchi Yaponiyadan - 16 nafar. Qolganlar navbati bilan keyingi o'rinlarni egallab turishibdi. Sayt xodimlari tuzib chiqqan ro'yxatdan jami 12ta mamlakat futbolchilari tanlab olingan.

Shu o'rinda savol tug'ilishi mumkin: O'zbekistondan faqat Marat Bikmaev ro'yxatga kiritilgan (32-o'rin), boshqa kuchli futbolchilarimiz yo'qmi? Bor, albatta. Lekin ular sayt nazarida yorqin va bir tekis o'yin ko'rsatmayotgan bo'lsa kerak. Bikmaev o'tgan yil O'zbekiston chempionati to'purari bo'ldi, "Lokomotiv" garchi OCHLda guruhdan chiqa olmagan bo'lsa-da, beshta gol urdi. Qolaversa, JCH saralash o'yinida safarda Koreya darvozasiga qariyb maydon markazidan to'p kiritdi.

O'ylashimizcha, sayt xodimlari reyting tuzib chiqayotganda mana shularni ham e'tiborga olishgan. Bu ro'yxatdan masalan Odil Ahmedov o'rin olishi mumkin edi, agar "Shanxay SIPG" o'tgan yil OCHL finaliga chiqqanida. Agar Ahmedov va Jeparov OCHLda hozirgidek o'yin ko'rsatishda davom etsa, o'ylaymizki, keyingi yil tuzib chiqiladigan reytingda ular ham bo'ladi.

Shuningdek, "Lokomotiv" Moskvada himoyachimiz Vitaliy Denisov bor. Agar Fourfourtwo.com Rossiya chempionatiga ko'p e'tibor qaratmagan deb o'ylasak, unda "Rubin" va "Amkar"da to'p tepayotgan eronlik futbolchilar ushbu ro'yxatga kiritilmasdi degan fikrdamiz. Suriyadan ikki futbolchi tanlanganiga kelsak, o'tgan yil Umar Al Soma haqiqatan zo'r o'ynadi. Ayniqsa uning "Ozodi" stadionida 90+4-daqiqada Eron darvozasiga kiritgan goli ancha shov-shuv bo'ldi. Shuningdek, Omar Xrbin ham mazmunli mavsumni o'tkazdi.

To'g'ri, bu reyting hech qanday rasmiy maqomga ega emas, lekin ancha pishiq va puxta tuzib chiqilgan degan fikr yuzaga kelyapti. Chunki ro'yxatdan joy olgan har bir futbolchi albatta nimadir qoyillatgan, yo'qsa jurnalistlar nazariga tushmagan bo'lardi. Muxlislarimiz reytingni turlicha qabul qilishdi. Kimdir rozi, kimdir norozi. Albatta, biz ham o'zbekistonlik futbolchilar ko'p bo'lishini xohlaymiz, lekin hamma gap mehnat va qandaydir yutuqqa ega chiqishda.

O'tgan yil ham, bu mavsum ham klublarimiz OCHLda guruhdan chiqa olishmadi. Bu yil hisobidan boshqa xalqaro rasmiy musobaqa qolmadi. Endi bor e'tiborimiz 2019 yilning yanvarida bo'ladigan Osiyo Kubogiga qaratiladi. Ajab emas mana shu musobaqada o'zimizni ko'rsatib, buning natijasida xorij saytlarining ham e'tiboriga tushsak.

Fourfourtwo taqdim etgan reyting haqiqatga yaqinmi?