Ko'pchilik muxlislarni Jurjevichning futbolchilik va murabbiylik faoliyati qiziqtirganligi bois, u haqda to'liqroq to'xtalishga qaror qildik.

Deyan Jurjevich 1967 yilning 4 iyul kuni Yugoslaviyaning Lazarevac shahrida dunyoga kelgan. U futbolchilik davrida yarim himoyachi bo'lgan. Jurjevich futbolchilik faoliyati davomida Serbiyaning “Kolubara” (Lazarevac), OFK (Belgrad, 1989 – 1993, 1994-1996, 2000-2002 yillar), “Chukarichki” (Chukarica, 1996-1998 yillar), Gretsiyaning “Apollon Smirnis” (Afina, 1993-1994 yillar), Shvetsiyaning “AIK” (Stokgolm, 1998-2000 yillar) klublari, shuningdek, Yugoslaviya terma jamoasi (1994-1995 yillar)da to'p tepgan.

Futbolchilik faoliyati davomida “AIK” klubi tarkibida 1999 yili Shvetsiya kubogini qo'lga kiritgan.

Deyan Jurjevich butsasini mixga ilgach, OFK klubining yoshlar jamoasida murabbiylik faoliyatini boshlab, 2006 yilgacha ushbu jamoani boshqardi.

Shundan so'ng, yosh mutaxassis 2007-2008 yillarda Serbiya U-23 yoshlar jamoasida faoliyat yuritdi.

So'ngra 2008-2009 yillarda “Chukarichki” klubini boshqardi.

Keyin faoliyatini OFK klubida davom ettirib, mazkur jamoani 2009-2011 yillarda boshqardi hamda 2010 yili Serbiya chempionatida 3-o'rinni egalladi.

Serbiyalik mutaxassis 2011-2012 yillarda Toshkentning “Paxtakor” klubida faoliyat yuritdi. “Sherlar”ning 2011 yilgi mavsumda bronza medali va O'zbekiston kubogi qo'lga kiritishlarida Deyan Jurjevichning ham munosib ulushi bor, albatta.

Serbiyalik mutaxassis 2012 – 2013 yillari Serbiyaning “Radnichki” (Kraguevac) jamoasini boshqardi.

Deyan Jurjevich 2014-2015 yillarda o'zi uchun qardon bo'lgan OFK klubida bosh murabbiy bo'lib faoliyat yuritdi.

2015 yilning yoz faslida serbiyalik mutaxassis yana yurtimizga qaytib, milliy terma jamoamizda 2017 yilgacha texnik direktor lavozimida ish olib bordi.

O'tgan yildan buyon Serbiyaning “Zemun” (Zemun) klubini boshqarayotgan Deyan Jurjevich kecha "Navbahor"da ish boshladi.

“Navbahor” PFK matbuot xizmati.

Deyan Jurjevich qaysi klublarda faoliyat yuritgan?