Jizzaxning "So'g'diyona" klubi o'z maydonida amaldagi chempion "Paxtakor"ni qabul qiladi. Dastlabki uchta turdan so'ng 9 ochko to'plagan "Paxtakor" turnir jadvalida birinchi o'rinda boryapti. "So'g'diyona" esa atigi 1 ochko jamg'argan holda 12-pog'onani egallab turibdi.

Joriy mavsumni safarda "Mashal"ga qarshi bahs bilan boshlagan jizzaxliklar kutilmaganda 0:3 hisobida mag'lub bo'lishdi. Kutilmaganda deyishimiz boisi "So'g'diyona" o'tgan yil 4-o'rinni qo'lga kiritgandi, "Mashal" esa bu yil Superligaga qaytdi. Ulug'bek Baqoev shogirdlari shundan so'ng uyda AGMKni qabul qilib 1:1 o'ynashdi. Bu bahsda maydon egalari bir kishi kam qolgan raqibni mag'lub eta olishmadi.

"So'g'diyona" 3-turni yana safarda o'tkazdi va "Qo'qon-1912" maydonida 1:2 hisobida mag'lub bo'ldi. Shunday qilib dastlabki 3 turda Baqoev shogirdlari hali g'alaba qozongani yo'q.

"Paxtakor" uchun bu birinchi safar o'yini bo'ladi. Chunki jamoa bungacha ketma-ket uchta turni o'z maydonida o'tkazib uchalasini ham g'alaba bilan tamomlagan. "Sherlar" ilk turda "Navbahor"ni 2:1, undan keyin "Buxoro"ni 3:0 va oxirgi turda "Metallurg"ni 4:1 hisobida mag'lub etishdi.

Bugungi uchrashuv oldidan "Paxtakor"ning imkoniyatlari yuqori baholanmoqda. Lekin har ikki jamoa ikki yarim oylik karantindan yaqinda chiqqanini va deyarli bir xil holatda ekanligini unutmaylik.

Bugun "So'g'diyona" mavsumdagi ilk g'alabasini qo'lga kiritishga urinib ko'radi. "Paxtakor" esa g'olibona yurishini davom ettirishga harakat qiladi.

P/S. Soat 18:00da boshlanadigan o'yinni "Sport" telekanali orqali to'g'ridan to'g'ri kuzatib boring.

Bugun futbol. "So'g'diyona" - "Paxtakor"