Saytimiz muxbiri mazkur jamoa sardori Azizbek Matkarimov bilan bog'lanib, klub oldidagi maqsad va vazifalar xususida suhbatlashdi.

- Azizbek, "Bag'dod" klubi yangi mavsumdan O'zbekiston Birinchi ligasida ishtirok etadi. Jamoa oldidagi maqsad va vazifalar qanday?

- O'tgan mavsum yakunlariga ko'ra o'tish o'yinlarida muvaffaqiyatli ishtirok etib, Birinchi ligada o'ynash huquqini qo'lga kiritdik. Jamoamiz oldiga mazkur chempionatda munosib ishtirok etish, mavsum yakunida sovrindorlar qatoridan o'rin olish vazifasi qo'yilgan. Maqsadimiz - Bag'dod tumaniga katta futbol havosini qaytarish. Yoshi katta muxlislar yaxshi bilishadi, bundan bir necha yillar avval tumanimizning "Bag'dodchi" jamoasi turli chempionatlarda muvaffaqiyatli qatnashgan. Har bir o'yinda stadion muxlislar bilan to'lib toshardi. Hozirda yana o'sha jamoa kabi "Bag'dod" futbol klubi shakllandi. Tarkibning aksariyati mahalliy yosh futbolchilardan iborat.

- "Bag'dod" jamoasi tarkibida tajribali futbolchilardan kimlar bor?

- Tarkibimizda Said Abdujabborov, Jasur Abdullaev, Oqilbek Mahmudov kabi tajribali futbolchilar bor. Jamoamiz bosh murabbiyi Sobir aka Jumaev boshchiligida mahalliy yosh iqtidorli futbolchilarga o'z tajribalarimizni o'rgatib kelmoqdamiz.

- Jamoa uy o'yinlarini qaysi stadionda o'tkazadi? Shuningdek, Pro-liga yo'llanmasi uchun ham kurashasizlarmi?

- "Bag'dod" jamoasi uy o'yinlarini tumanimizdagi "Markaziy" stadionda o'tkazadi. Bilasizmi, Farg'ona viloyati 2-ligasi doirasidagi o'yinlarda ham juda ko'plab ishqibozlar stadionga kelishdi. Birinchi liga doirasidagi o'yinlarda "Markaziy" stadion muxlislar bilan to'lib toshishi aniq. Bag'dod tumanida futbolni juda yaxshi ko'rishadi.

Jamoamiz oldiga Pro-liga yo'llanmasini qo'lga kiritish vazifasi ham qo'yilgan. Biz ushbu maqsad yo'lida astoydil harakat qilamiz.

Bekzod Tolibov yozib oldi

Azizbek Matkarimov: "Maqsadimiz - Bag'dod tumaniga katta futbol havosini qaytarish"