Jumladan futbolimiz tibbiyoti ham yangi davrni boshidan o'tkazmoqda. Buni yaqindagina ochilgan Sport tibbiyoti va reabilitaciya markazi misolida ham ko'rishimiz mumkin. Uning faoliyati bilan yaqinroq tanishish maqsadida taniqli mutaxassis, tibbiy markaz direktori va bosh sport shifokori Abror Pirriev bilan qisqa suhbat qurdik:

- Abror aka, futbolimiz tibbiyotidagi bugungi jarayonda nimalarni alohida urg'ulab o'tgan bo'lardingiz?

- Avvalo futbolimiz Milliy futbol markazi ko'rinishida o'z uyiga ega bo'lgani, shu qatorda Sport tibbiyoti va reabilitaciya markazi faoliyati yo'lga qo'yilgani futbolimiz, futbol tibbiyoti uchun muhim qadam bo'ldi. Tibbiy markaz faoliyatidagi ilk qadamlardan eng e'tiborlisi sifatida terma jamoa va futbol klublar a'zolarining reja asosida tibbiy markazdan chuqurlashtirilgan tibbiy ko'rikdan o'tishini tashkillashtirishni keltirib o'tish mumkin.

- Endi barcha futbolchilar ushbu markazdan tibbiy ko'rikdan o'tishadi, to'g'rimi?

- Xuddi shunday. Barcha terma jamoalar, shuningdek PFL ro'yxatidan o'tuvchi futbol klublarimiz a'zolari tibbiy markazimizda ko'rikdan o'tishmoqda. Endilikda futbolchilarimiz turli tibbiy muassasalarda sargardon bo'lmay, reja asosida tibbiy markazimizning malakali xizmatlaridan foydalanishlari mumkin bo'ladi.

Yana bir jihatni alohida ta'kidlab o'tishni xohlardim. Mana jahon futboli tajribasida ko'rar edik-ki, biror futbol klubi qaysidir futbolchi bilan shartnoma tuzishni reja qilsa, avval tibbiy ko'rikdan o'tishi borasida aytilardi va unga alohida e'tibor qaratilib, hammasi yaxshi bo'lsa keyingina shartnoma imzolanadi. Bizda esa bunday qilinmasdi. Avval shartnomani tuzib qo'yib, keyin esa turli muammolar kelib chiqqan turfa voqealarni ko'p eshitganmiz. Endi esa biz shu odatga chek qo'yib, jahon tajribasi ila ishlashni yo'lga qo'ya boshladik. Yani endilikda ixtiyoriy klub biror bir futbolchini, ayniqsa legionerlarni o'z safiga qo'shib olmoqchi bo'lsa, bizga murojaat qiladi. Biz futbolchini chuqurlashtirilgan tibbiy ko'rikdan o'tkazib, sog'lom yoki biror tibbiy muammosi borligini aniqlaymiz va batafsil ma'lumot beramiz. Shu asosda futbol klub barcha “risk”larni inobatga olib, shartnoma imzolash yoki imzolamaslik masalasini ko'ra oladi.

- Hozirgi kunda tibbiy ko'rikdan o'tish tartibi qanaqa yo'lga qo'yilgan?

Javob: Ilgari futbol klublari betartib holda, xohlagan payt tibbiy ko'rikdan o'tardi. Yani “zayavka” uchun... Hozirda belgilangan tartib va reglamentga ko'ra futbol klublari o'z futbolchilarini qishki o'quv-mashg'ulot yig'ini avvalidan yoki yig'in boshida – kuchli jismoniy yuklamalar berishni boshlashdan avval, chuqurlashtirilgan tibbiy ko'rikdan o'tkazishlari lozim. Yani avval futbolchini sog'ligi, uning jismoniy holati haqida to'liq ma'lumotga ega bo'lib, keyin mashg'ulotlar boshlanadi.

- Bu mantiqan ham to'g'ri yondoshuv. Shunda barcha jamoalar hozir tibbiy ko'rikdan o'tib bo'lishdimi?

- Hozirda qariyb barcha jamoalar ayni damda shakllangan tarkibini chuqurlashtirilgan tibbiy ko'rikdan o'tkazib bo'lishdi. Yangi shartnoma tuzganlar va ko'rikdagilar esa alohida tartibda o'tkazib borilmoqda. Ammo birgina jamoa – "Neftchi" umuman tibbiy ko'rikdan o'tmay, naq bir yarim oyga butun boshli jamoani chet el yig'iniga olib ketdi. O'ylab ko'ring, jismoniy yuklamalar, o'rtoqlik o'yinlari ila davom etuvchi uzoq muddatli chet el yig'iniga.., balki chempionlarga mumkin deb o'ylashgandir (kuladi). Bu masalada Neftchi yangicha yondoshuvni emas, balki eski usulni – noprofessional yo'lni tanladi. Jamoalarga qulaylik yaratish maqsadida rahbariyat tibbiy markazimizning dam olish va bayram kunlari davomida ham uzluksiz faoliyat ko'rsatishini taminlab bergan bir paytda bunday munosabatni boshqacha tariflab bo'lmaydi. Bu so'zlar avvalo jamoa tibbiy shtabiga taalluqli. Xullas, bunday holatlar kelgusida takrorlanmasligi kerak. Jahon tajribasi ancha yildan beri yurib kelgan yo'lni tezroq bosib o'tib, futbol tibbiyotida ham yangi – professional yondoshuvga o'tib olishimiz kerak.

- Tibbiy ko'rikdan tashqari tibbiy xizmatlar haqida gapirsangiz.

- Bilasiz milliy futbol markazida turli yoshdagi terma jamoalar o'quv-mashg'ulot yig'inlarini o'tkazishadi. Ular trenajyor zali, suv havzasi, fizioterapiya bo'limlaridan, reabilitacion tadbirlar ila foydalanishadi. Bu faoliyatni to'liq yoritib berish uchun alohida, uzoq suhbat qurish kerak...

- Legionerlar tibbiy ko'rikdan o'tish davomidagi taassurotlari bilan o'rtoqlashishadimi?

- O'zim ham qiziqib legionerlar bilan, ular avval to'p tepgan jamoalarida qanday tibbiy ko'rikdan o'tgani borasida qiziqaman. Ular qiziqish va havas bilan butun binoni bir sidra ko'zdan kechirishadi mudom. O'z mamlakatlaridagi futbol tibbiyoti bilan solishtirib, “ancha ilgarilab kyetibsizlar” deyishgani ancha.

Abror Pirriev: "Neftchi" noprofessional yo'lni tanladi"