Ўйиндан сўнг жамоамиз ўйинчиси Абдурауф Бўриев баҳс ҳақидаги фикрлари билан ўртоқлашди.
— Дастлабки ўйин ҳар доим қийин руҳда ўтган. Туркманистон яхши қаршилик кўрсатди. Бироз қийинчиликлар бўлди, лекин муаммоларни секин-аста енгиб ўтамиз.
— Рақибнинг бу даражада қаршилик кўрсатишини кутганмидингиз?
— Албатта, рақибнинг чуқур ҳимоявий ўйин намойиш этишини кутгандик. Шунга яраша тайёргарлик кўрдик.
— Бугун футболчилар эркин ўйин намойиш этишди. Жамоавий комбинацион ўйиндан кўра, ўйинчиларнинг ўзлари вазиятларни якунлашга ҳаракат қилишди. Мураббий шундай кўрсатма берганмиди ёки рақиб шуни тақозо этдими?
— Рақиб бизни шунга мажбур қилди. Албатта, мураббийнинг кўрсатмаларини ҳам бажаришга ҳаракат қилдик. Лекин рақиб қаршилиги туфайли ўзимиз кутгандек ўйин намойиш этолмадик.
— Бир вазиятда тўпни олдириб қўйдингиз ҳамда рақиб дарвозабон билан деярли бирга-бир вазиятга чиқиб бориб, зарба ҳам йўллади. Яхшиямки, вазият бартараф этилди. Агар ўшанда гол ўтказиб, натижа кўнгилсиз якунланганда, танқидлардан чўчимасмидингиз?
— Танқидларга аҳамият бермаслик лозим. Акс ҳолда бу нарса психологик жиҳатдан салбий таъсир ўтказади.
