"Bunyodkor" futzal klubi bosh murabbiyi Abdulla Bo'riev yangi mavsum oldidan kutilmalar, legionerlar, yangi jamoalar haqida fikrlarini bildirdi.

"Xabaringiz bor, futzal federaciyasi yana qaytadan tashkil topdi. Superkubok uchrashuvi ham o'ziga hos ajiotaj uyg'otmoqda. Chempionat ham qizg'in ruhda o'tadi deb o'ylayman. To'g'ri, boshida kamchiliklar bo'lishi mumkin. Lekin jamoalarda ishtiyoq yuqori. Klublarga talablar qo'yildi, legionerlar ko'paydi. Deyarli har bir jamoada braziliyalik, amerikalik legionerlar bor. Bekzod Akmalovich aytganlaridek chempionlik uchun bitta emas, uch-to'rt nafar jamoa kurash olib boradi. Legioneri yo'q jamoalar uchun ham bu mavsum dars bo'ladi. Ularga qarab intilishadi, o'zimizni yigitlar braziliyaliklar bilan kuch sinashadi. Tajriba orttirishadi. Chempionat orqali terma jamoa kuchayadi. Raqobat yaxshiki kuchli oltilik uchun kim kurashishi ham o'ylantirmoqda. Oldindan hech narsa aytib bo'lmaydi.
Yangi jamoalarga kelsak, SQB, "Qizilqum", "Surxon" munosib ko'rashishini kutmoqdaman. Navoiy jamoasi o'tish o'yinida "Paxtakor"ni yutib chiqdi. Tarkibida yosh futzalchilar bor. SQBni BMBga asosiy raqobatchi sifatida ko'rmoqdaman. "Qizilqum" ham oltilik uchun kurashadi. Samarqand jamoasi doim yosh futzalchilarni etkazib kelgan. Ular safiga braziliyalik legionerlar qo'shildi. Shunday ekan nima uchun "Dinamo"dan ham yaxshi ishtirok etmasligi kerak?
"Bunyodkor" o'zi ishtirok etib kelayotgan barcha mavsumlarda oltilikka kirishga harakat qilib kelgan. Bu yil ham kurashamiz, barcha jamoalar bilan o'ynaymiz. Tarkibimizni o'zagini saqlab qolganmiz. Shartnomalari ham amalda. Rahbariyat bilan gaplashdikki, ikkinchi davrada jamoamizga legioner qo'shib olishimiz mumkin. Bu rejamizda bor albatta",- deydi Abdulla Bo'riev.

Abdulaziz Iskandarov yozib oldi

Abdulla Bo'riev: "Ikkinchi davrada tarkibimizga legioner qo'shib olishimiz mumkin, yangi mavsumda hammaga kurash taqdim qilamiz"