Умид Эргашев: "Тахминимча, "Насаф" чемпионат илк турида "Нефтчи" ёки "Динамо" билан рўбарў келади"

"Волгарь" билан ўйиндан сўнг "аждарлар" дарвозабони Умид Эргашевга юзландик. Посбон терма жамоамизнинг январь ойида БААдаги йиғинида ҳам иштирок этди. Суҳбат давомида шу ҳақда ҳам сўрадик. 

"Терма жамоанинг йиғинидан сўнг клуб ихтиёрига етиб келдим. Қўшилиб кетишда ортиқча муаммо бўлмади. Ҳаммамиз бир оиламиз. 

БААда асосан, ўйинни шакллантириш, жисмоний ҳолатни тиклаш устида ишладик. Сречко Катанец барчага имконият берди. Кимнинг нималарга қодирлигини билиб олди, деб ўйлайман. Бу мураббий ҳимояга жуда катта эътибор қаратади. Орқа чизиқ вакилларидан тартибли ўйин талаб қилмоқда. Менталитетни ўзгартирмоқда. 

Кўрганингиздек, бугун Россия клубига қарши ўйнадик. Мураббийимиз иккита таркибни ҳам синовдан ўтказиб кўрди. Яқинда қуръа ташланади. Албатта, қуръадан олдин бирор нарса дейиш қийин. Тахминимча, чемпионат илк турида "Нефтчи" ёки "Динамо" билан тўқнаш келишимиз мумкин. Суперлигада кўп клублар кучаймоқда. Ҳозирда Антальяда 10 га яқин жамоанинг машғулот олиб бораётгани фикримга исбот бўла олади", – дейди Умид Эргашев