"Реал" Мбаппе учун 200 млн евро тўлаши мумкин. Пул тайёр (Хосеп Педрерол)

Журналист Хосеп Педрерол  El Chiringuito TV эфирида "Реал" ҳужумчи учун 200 млн евро беришга тайёрлигини айтди.

"Реал" президенти Флорентино Перес ва Мбаппе 2024 йилнинг ёзида бепул трансфер бўйича келишувга эришганди. Бироқ Килианнинг Париж клубига йўллаган мактуби ва француз клубининг сигналлари ҳужумчининг трансфери бўйича музокаралар ёзда ҳам қизғин тус олишига сабаб бўлди.

"Мен фақат "Реал"нинг режасини очиб бера оламан. Улар Килиан Мбаппе ПСЖга шартномани узайтирмаслигини яна айтгунча кутишади. Улар ПСЖ билан музокара олиб боришмайди. Мбаппенинг онаси шартнома узайтирилмаслигини тасдиқлагач, "Реал" "нажоткор" ролини ўз зиммасига олади.

Айни пайтда 200 миллион евро тайёр", – деди Педрерол.

AS газетаси, 200 млн евро бошланғич нарх эканлигини ёзмоқда. Қайд этилишича, Мбаппе фақат "Реал"га ўтмоқчи ва бу мадридликларга музокараларда ёрдам беради. Трансфер ойнаси ёпилиши билан парижликларнинг молиявий талаблари камайиши мумкин.