Эронлик журналист: "Бугун Эрон ғалаба қозониши ва мундиал масаласини ҳал этиши керак"

ЖЧ-2026 3-саралаш босқичи доирасидан ўрин олган баҳс икки терма жамоани ҳам мундиал йўлланмасига янада яқинлаштиради, Эрон эса бугуннинг ўзидаёқ Жаҳон чемпионатига чиқиши мумкин. Биз эса муҳим баҳс олдидан, Эроннинг энг машҳур нашрларидан бирида фаолият олиб борувчи спорт журналисти Меҳди Мортазавиан бўлажак ўйин ҳақида фикр билдирди.

"Бу ўйин ҳар икки жамоа учун ҳам жуда муҳим. Эрон жаҳон чемпионати йўлланмасини иложи борича тезроқ қўлга киритишни кўзламоқда. Бош мураббий Амир Ғаленоининг асосий мақсади шу, чунки у Эрон футболи тарихида ўз изини қолдириб, терма жамоани жаҳон чемпионатига олиб чиқишни истайди. Шунинг учун, бугунги баҳсда ижобий натижага эришиш ва мундиал йўлланмасини қўлга киритилиши лозим. Қисқаси, ушбу баҳсдан сўнг барча мундиал йўлланмаси қўлга киритилганлигини нишонлашга тайёргарлик кўрмоқда.

Меҳди Тареми ва Саид Иззатуллоҳи майдонга тушишга тайёр, бу эса Эрон учун ажойиб хабар. Ўзбекистон ҳам анча кучли таркиб билан Теҳронга келди, Элдор Шомуродов ва Абдуқодир Ҳусановларни бутун дунё танийди. Тактикага келсак, Ғаленои Ўзбекистон бу ўйинда 3-4-3 услубида ўйнашини тахмин қилди.

Бугун Эрон ғалаба қозониши ва мундиал масаласини ҳал этиши керак" - дея фикр билдирди Mehrnews нашри спорт журналисти Меҳди Мортазавиан.