"Челси" етакчисини жамоада сақлаб қолиш учун унга катта маош таклиф қилмоқда

Машҳур журналист ва инсайдер Грэм Бэйлининг маълум қилишича, "нафақахўрлар" раҳбарияти 25 ёшли ярим ҳимоячининг вакиллари билан янги шартнома юзасидан алоқага чиққан.

Хабар қилинишича, "Челси" аргентиналик футболчини сақлаб қолиш осон бўлмаслигини тўлиқ тушунмоқда, чунки унга ПСЖ ва "Реал" каби клублар томонидан жиддий қизиқиш бор. Шунга қарамай, улар уни "Стэмфорд Бриж"да қолишга кўндиришга ҳаракат қиляпти.

"Челси" таянаётган асосий омил — Энцо учун янги маош. У янги битим бўйича ҳафтасига тахминан 400 000 фунт стерлинг маош ва қўшимча бонуслар олиши кўзда тутилган.

Агар аргентиналик футболчи "кўклар"нинг янги таклифини қабул қилса, у Ҳоланд ва Мбаппе қаторида дунёнинг энг юқори маош олувчи футболчиларидан бирига айланади.

Фернандес жорий мавсум "Челси" сафида 45 ўйинда майдонга тушиб, 12 та гол урди ва 6 та голли узатмани амалга оширди. Унинг амалдаги келишуви 2032 йилгача мўлжалланган.