Анчелоттидан "Реал" ҳам, Бразилия федерацияси ҳам норози

"Реал" бош мураббийи Бразилия терма жамоасига тайинланишга яқин эди, бироқ келишув бузилди ва энди италиялик мутахассис Саудия Арабистонидан таклифни кўриб чиқмоқда.  

Relevo хабарига кўра, 29 апрель куни тушдан кейин Анчелотти Бразилия футбол конфедерациясига (CBF) "Мадрид" уни июнь ойида қўйиб юбормаслигини маълум қилган. Мутахассис бразилияликлар билан айнан июнь ойидан иш бошлашни келишиб қўйган эди.

"Реал" 65 ёшли мутахассисни АҚШда клублар ўртасида бошланадиган жаҳон чемпионатигача (КЖЧ) қўйиб юбормасликка қарор қилди. Клуб шартноманинг сўнгги йили учун 11 млн евро товон пули тўламасдан бунга тайёр эди. Айтилишича, Анчелотти ушбу суммани олишни хоҳлаган. Бу музокараларнинг бузилишига асосий сабаблардан бири бўлди.  

Бразилияда Карлонинг 26 май куни Рио-де-Жанейрога келиши ва Эквадор (4 июнь) ва Парагвай (9 июнь)га қарши ўйинлар учун таркибни эълон қилиши режалаштирилган эди. Барча нарса, жумладан, 2026 йилги ЖЧгача бўлган шартнома келишилганди. Энди бу келишув деярли амалга ошмайди ва CBF Жорже Жезушни тайинлашни кўриб чиқмоқда.  

Анчелоттининг бу вазиятдаги хатти-ҳаракатларидан "Реал" ҳам, Бразилия ҳам норози. CBF келишув бузилганидан, "Мадрид" эса мураббийнинг бразилияликлар билан музокаралар олиб боргани (гарчи Карло клубдан рухсат сўраган бўлса-да) ва бразилияликлар билан суҳбат туфайли "Реал"даги бир йиғилишга бир марта кечикиб келганидан норози.  

Эслатиб ўтамиз, аввалроқ "қаймоқраглилар" "Байер"дан Хаби Алонсони бош мураббийликка таклиф қилиш ниятида экани хабар қилинган эди.