"Турон" мураббийи Миржалол Жўраев: "Иккала жамоа ҳам ғалабага лойиқ эмасди"

- Ўйин биз кутгандек ҳужумкор руҳда бошланмади. Натижа икки жамоанинг кўрсатган ўйинига мос бўлди. Бугунги баҳсда иккала жамоа ҳам ғалабага лойиқ эмасди. Барчаси 0:0 ҳисобида акс этиб турибди. Биз ғалаба қозонишни истагандек, бироқ ишлар ўхшамади.

- Жамоа бош мураббийи ўйин қайдномасига киритилмади.

- Бу ҳақда тўғриси жавоб бера олмайман. Саволни тўғридан-тўғри клуб раҳбариятига берганингиз маъқул.

- Сиз биринчи давра якунига қадар жамоани бошқарасизми ёки мавсум якунига қадар?

- Ҳозирча бу ҳам мавҳум. Раҳбарият бизга дастлабки икки баҳсга жамоани тайёрлашимиз кераклигини айтишди. Ҳали мақсад ва вазифалар борасида гаплашиб кўрганимиз йўқ. Бундай саволларнинг барчасини раҳбариятга йўналтирганингиз маъқулроқ.

- "Турон" футболчиларида иккинчи бўлимда чарчоқ аломатлари сезилди. Бу ўйинга бўлган тайёргарликнинг кечикиб кетгани боисми? Кейин эса Қувондиқ Рўзиевни захирага олганингизда эътироз билдиргандек бўлди. Бу тўғри қарор бўлдими?

- Вазиятдан келиб чиққан ҳолда тайёргарликни кеч бошладик. Ўйинга етарлича даражада тайёрлана олмадик. Йигитларнинг жисмоний ҳолати ҳам яхши эмасди. Шунинг ҳисобига ҳам бўлган бўлса керак. Қувондиқ борасида гапирадиган бўлсам, у томонидан ҳеч қандай эътирозлар бўлмади. Буни тўғри алмаштириш бўлди деб ҳисоблайман.