ПСЖдан ижарага олинган ва "Тоттенхэм"да тўп тепаётган ҳужумчи Рандаль Коло-Муани кичик йўл-транспорт ҳодисасига учради. Хизмат сафари вақтида футболчининг соғлиғига зарар етмаган.
Сешанба кунги машғулотдан сўнг аэропортга йўл олган французнинг "Ferrari Purosangue" русумли автомобили шинаси ёрилиб кетган. Коло-Муанининг ортидан бошқа машинада келаётган жамоадоши Вильзон Одобер дарҳол тўхтаб, Рандалга ёрдам берган.
"Тоттенхэм" бош мураббийи Томас Франк воқеа юзасидан маълумот бериб, иккала футболчи ҳам бугун Чемпионлар Лигаси доирасидаги "Айнтрахт"га қарши ўйинда иштирок эта олишини тасдиқлади.
"Иккаласи ҳам ўзини яхши ҳис қилмоқда, ҳаммаси жойида. Мен улар билан ҳали шахсан гаплашмадим, лекин аҳволлари яхшилигидан хабарим бор. Улар кейинроқ жамоа ихтиёрига учиб кетишади", — деди Франк.
