Термиздаги ўйин назоратчиси жанжал қаердан келиб чиққанини маълум қилди

Қизиғи, ҳамма қизил карточкалар 90+4-дақиқада кўрсатилди. Бош ҳакам ҳар икки жамоанинг тўрттадан ўйинчисини майдондан четлатди.

Мана шу баҳсда шаҳрисабзлик таниқли назоратчи Шамил ака Жумаев ҳакамлар назоратчиси сифатида ишлади. Биз Шамил ака билан боғланиб ўйинда юз берган воқеани ўрганишга ҳаракат қилдик.

- Ассалому Алайкум, Шамил ака яхшимисиз?
- Раҳмат, Худога шукур яхшиман.

- Шамил ака, кеча бўлиб ўтган биринчи лиганинг "Сурхон" - "Андижон" баҳсида сиз ҳакамлар назоратчиси бўлиб ишладингиз. Бу ўйинда нима воқеа юз берди?
- Иккита жамоа футболчилари ўйин охирларида тўрттадан қизил карточка олишди. Бу ҳақда учрашув протоколида ҳам кўрсатилган.

- Нима бўлди ўзи жанжалми?
- Ҳа, футболчилар ўзларини бошқара олишмай қолишди. Иккала жамоага ҳам ғалаба зарур эди. Натижада жанжал келиб чиқди.

- Жанжални ким бошлади?
- Жанжални андижонлик футболчи бошлади.

- 90-дақиқада "Андижон" футболчиси гол ургач, ҳисоб 2:2 кўриниш олди. Ҳаммаси шундан кейин бошландими?
- Йўқ, голдан кейин эмас. Голдан сўнг ўйин яна давом эттирилди. Ҳакам тўхталишлар учун олти дақиқа қўшди. Майдон марказидаги қўполликдан сўнг жанжал бошланиб кетди. Бу пайтда 90+4-дақиқа ўтиб бораётганди.

- Демак, ўйин тугашига икки дақиқа қолганида юз берган. Ундан кейин ўйин тўхтатилдими?
- Қизил карточкалар берилганидан кейин ҳам учрашув икки дақиқа давом эттирилди. Баҳс якунига етгач, футболчилар бир-бирларининг қўлини сиқиб қўйишди. Ҳеч ким ортиқча иш қилмади.

Хайрулла Холиқов ёзиб олди.