“Тақдиримга “Андижон”да ўйнаш насиб қилган экан” ёхуд Суҳроб Бердиевнинг янги жамоаси ҳақида фикрлари қандай?

Футболчи “Андижон” клуби билан шартнома имзолади. Шундан кейин у билан боғланиб, фикрларига қулоқ тутдик.

- Янги жамоага ўтишингиз қай тариқа амалга ошди?

- Ҳаммаси оддий амалга ошди. Клуб менга таклиф билан чиқди. Аслида қишда ҳам таклиф бўлган ва жамоа билан бирга эдим. Кейинчалик у ердан кетиб қолгандим. Ёзги трансфер вақтида яна чақиришди. Тақдиримга барибир “Андижон” сафида ўйнаш ёзилган экан, кейинчалик бўлса ҳам жамоа билан шартнома имзоладим. 

- Шартнома муддати қанчага мўлжалланган?

- Ҳозирча йил охиригача мўлжалланган шартномага имзо чекдим. Худо хоҳласа, жамоа олдига қўйилган вазифани бажарсак, кейинчалик раҳбарият билан келишувни яна узайтириш борасида гаплашиб кўришимиз мумкин. 

- Қишда жамоа билан бирга эдингиз. Кейинчалик нима сабабдан кетиб қолдингиз? Виктор Кумиков сизда қандай таассурот қолдирди?

- Жуда яхши мутахассис. Виктор Балютич қишда юз берган тушунмовчиликларни эсдан чиқариб, мен яхши кайфиятда қабул қилиб олди. Тушунмаганларимни ўргатиб бормоқда. Ҳозирда ҳаммаси жуда яхши.

- “Андижон”нинг Суперлигага қайтиш имкониятини қандай баҳолаган бўлардингиз?

- Худо хоҳласа, имкониятларимиз жуда яхши деб ўйлайман. Олдинда турган баҳсларда ижобий натижалар қайд этмоқчимиз. Ўйлайманки, жамоа билан Суперлигага қайтиш вазифасини уддасидан чиқамиз. 

- Мавсумнинг биринчи қисмини “Янгиер” клубида ўтказдингиз. У ердаги фаолиятингиз борасида нималарни айта оласиз?

- У ерда ҳаммаси яхши бўлди дея оламан. Тўғри, мавсумнинг бошида бироз қийин бўлди. Натижаларимиз ҳам яхши бўлгани йўқ. Кейинчалик секин-аста очколарни қўлга киритдик. Ўйинимдан ҳам қониқиш ҳосил қила бошлагандим. Шу ўринда “Янгиер” жамоаси раҳбари, мураббийлари, мухлисларига ўз миннатдорчилигимни билдаман. Жамоанинг иккинчи даврадаги ўйинларига фақат омад тилайман.