Шуҳрат Мақсудов: "Нима учундир ҳамма "Бунёдкор"га ёпишиб олган. Кундуз куни ҳам тирноқни ичидан кир қидиришади"

- Авваламбор ассалому алейкум. Бугун шундай жанговар ўйин бўлишини билган эдик. Чунки кубок баҳслари доим юқори руҳда ўтади. Икки жамоа ҳам бугун кейинги босқичига чиқиш йўлланмасини ҳал қилиши мумкин эди. Ҳавотир олган жиҳатим, йигитларнинг руҳияти. Аввалги учта ўйинни, сафарда "Металлург"ни мағлуб этганимиз қайсидир маънода хотиржамлик берди. Шунинг учун футболчилар бемалол ҳаракат қиламиз, деган фикр остида майдонга чиқишди шекилли. Ҳар бир рақибга ҳурмат билан муносабатда бўлиш керак.

- Дилшод Жўраевнинг эрта алмаштирилишига батафсил изоҳ бера оласизми?

- У бошиданоқ ўйинга яхши киришиб кета олгани йўқ. Бир нечта қўпол хатоларга йўл қўйди. Мураббийлар штаби билан маслаҳатлашиб алмаштиришга қарор қилдик. Буни яна кўриб чиқамиз. 

- Балки ички муҳитга боғлиқлик жойи бордир? Негаки, Томива ва Жўраев пенальти талашган вазиятдан сўнг кўпчиликда шундай фикрлар уйғонди...

- Менимча ҳар бир ўйинда бундай вазиятлар учрайди. Нима учундир ҳамма "Бунёдкор"га ёпишиб олган. Кундуз куни ҳам тирноқни ичидан кир қидиришади. Йил якунида терма жамоамиз ҳам мусобақадан қолиб кетса, шу мавзуни ахтаришлари кулгули. Ҳеч нарса бўлгани йўқ. Очиғи тушунмадим. "Бунёдкор"да ҳаммаси яхши. Йигитларга ўйин учун раҳмат айтдим. Ўзимиз ўйнаган баҳслардан мисол келтирдим. Фақат ютаверсангиз қизиғи қолмайди. Футболда ғалаба, мағлубият, тортишувлар бўлиши табиий. Футбол шаҳмат эмас-ку. 

- Ҳимоячи ўрнига Музаффар Олимжоновни туширдингиз. Бу ҳужумни кучайтириши кутилганди...

- Режамиз ҳам шундай эди. Олдиндан йиқилишимни билганимда кўрпа қўйиб олардим. Бу - футбол. Афсуски, захирадан тушганлар ўтган сафардагидек ўйинни кучайтира олишмади. Ҳақиқий юраги тоза инсон бу нарсаларни яхши тушунади.