Салим Зокиров: "Тушунмаяпман, нега "А" гуруҳи ҳам Про-лига, "Б" гуруҳи ҳам Про-лига"

"Футболнинг ёзилмаган қонуни бор - сен урмасанг сенга уришади. Рақиб жамоа биринчи голини киритгунга қадар биз 100 фоизлик вазиятдан фойдалана билмадик. Кейинчалик илк гол урилди ва биз пенальтидан унумли фойдаланишни уддаламадик. Озгина омадимиз келганида натижа биз томонда бўларди. Биринчи бўлимда бизда ҳам кўплаб вазиятлар бўлди. Иккинчи бўлимда эса аксинча ҳолат кузатилди. Биз рақибдан вазиятлардан фойдалана олмаслик борасида ожизлик қилдик.

Ҳа, жамоанинг катта қисми ёшлардан иборат. Бизнинг молиявий ҳолатимиз юқори даражада эмас ва шу сабабли ҳам тажрибали футболчиларни олиб кела олмаймиз.

"Нурафшон" мавсумни бемалол кўтаринки кайфиятда якунлай олади. Жамоани кучли мураббийлар штаби бошқармоқда. Улар қандай ишлаш кераклигини билишади.

Тушунмайман, нега "А" гуруҳи ҳам Про-лига, "Б" гуруҳи ҳам Про-лига? Ахир икки гуруҳнинг статуси бошқачароқ-ку. "А" гуруҳи аутсайдерлари "Б" гуруҳга тушиб кетади. "А" гуруҳининг етакчилари эса Суперлигага чиқишади. Ундан кўра, "А" гуруҳини Про-лига, "Б" гуруҳини биринчи лига деб аташ керак эди. Ваҳоланки, "А" гуруҳининг барча жамоалари ҳам инфратузилмаси юқори савияда эмас ва Суперлига вазифасини қўймаган", - деди Салим Зокиров.

Миржалол Норматов суҳбатлашди