Рўзиқул Бердиев: “Насаф”да руҳий тушкунлик бор, Рашидов эса жамоамизни тарк этади"

Рўзиқул Бердиев: - Бугун мағлубиятга учрадик. Бунга сабаб, жамоамизда руҳий тушкунлик бор. Шунингдек бугунги ўйинда жисмонан тайёрмасдек ўйнадик. Тўғрироғи, охирги пайтда вужудга келган муаммолар туфайли, футболчиларимиздаги иштиёқни оширишга ҳам қийналаяпмиз. Бугун суст ҳаракат қилдик, гўёки футболчиларимиз толиқиб қолгандек. Аммо бари-бир уларга эътироз билдирмайман. Вазиятни ўнглаш учун ҳаракат қилишди. Таъкидлаш жоиз, “Сўғдиёна” жамоаси бугун ҳимояда яхши ўйнади ва қарши ҳужумлардан фойдалана олди. Бизнинг бугунги ўйинга тузган режамиз шундай эдики, стандарт вазиятлардан кўпроқ фойдаланиш ва етакчи ўйинчиларимизнинг  тажрибасидан фойдаланиш эди. Афсуски бу режамиз амалга ошмади.

Шуни алоҳида таъкидлашни истардим ҳозирги муаммоларимиз ўз йўлига, аммо биз майдонга тушдикми, ғалаба учун ҳаракат қилишимиз керак. Биздан мухлисларимиз шуни кутишади.  

Санжар Рашидов билан оғзаки келишувга эришдик, у жамоамизни тарк этади. Афсуски, Рашидов жамоамиз ўйинига киришиб кета олмади. Кўпроқ захирада қолиб кетгани, уни ҳам бизни ҳам қониқтирмайди. Бу ёшдаги футболчи ўйини қовушадиган жамоада фаолият юритгани маъқулроқ.

Драган Черан “Локомотив” билан бўлган учрашувда қайта жароҳат олганди. У шу пайтгача даволаниш билан банд бўлди. Ҳозир машғулотларни бошлаган, ўйлайманки, кейинги ўйинларда у бизга ёрдам бера олади.

Жасур Ҳасанов: - Биз бугунги ўйинга яхши тайёрланган эдик. Ўйинимиз кўнгилдагидек чиқмади. Начора, бу футбол футболда ғалаба ва мағлубият доимо ёнма-ён юради. Биз энди бу мағлубиятни тезроқ унутишимиз ва кейинги ўйинларга руҳан тайёр бўлишимиз талаб этилади. Ишонаманки, жамоадошларим келгуси ўйинларда мухлисларимизни хурсанд қилиш учун майдонга тушишади. Биз бу мағлубиятдан фожеа ясамаслигимиз керак.