Рўзиқул Бердиев: "Кубок ўйинлари давомида йигитларда кучли иштиёқ сезмадим"
28 апр 22:11
Янгиликлар

Рўзиқул Бердиев: "Кубок ўйинлари давомида йигитларда кучли иштиёқ сезмадим"

Ўзбекистон кубогининг 3-туридан ўрин олган "Андижон" - "Насаф" (1:0) учрашувидан сўнг меҳмонлар бош мураббийи Рўзиқул Бердиев матбуот анжуманида иштирок этди.

Ўйин ҳақида

- "Андижон" жамоаси кейинги босқичга чиққани билан табриклайман. Улар тартибли ўйнаб, ғалабага эришишди. Биз ўйинни назорат қилишга интилдик, ўша қизил карточкадан ҳам сўнг ҳужумлар ташкил этдик, олдинга интилдик. Бироқ "Андижон" жамоаси қўшиб берилган дақиқаларда қарши ҳужумда гол уриб кетди.

- Абдувоҳид Неъматовнинг таркибда йўқ экани жамоа натижаларига таъсир кўрсатдими?

- Келинглар, бу масалани муҳокама қилмайлик. Ютқазса, бутун жамоа ютқазади. Дарвозабон кўп вазиятларда жамоамизни қутқармади. Бироқ, ҳужум чизиғимиз гол урганида натижа бошқачароқ бўларди.

- "Насаф" кетма-кет 3 марта кубок соҳиби бўлганди. Бу йилги натижага муносабатингиз?

- Албатта, мусобақани гуруҳ босқичида якунлашга мажбур бўлдик. Тўғриси, кубок учрашувлари давомида йигитларда кучли иштиёқ кўрмадим. Йўқотишлар ҳам ўз таъсирини кўрсатмасдан қолмади. "Андижон" майдонидаги муҳит ва мухлисларнинг жамоа руҳиятига таъсирини алоҳида таъкидлаб ўтиш керак.