Равшан Ҳайдаров: "Динамо"да ҳаммаси жойида

Мураббийнинг "СА"га хабар қилишича, "Динамо" 15 декабрь куни ўз йиғинини Самарқандда бошлайди. Дастлабки 1 ҳафталик машғулотларда маҳаллий ёшлар иштирок этадилар. Улар асосан 1994 йил ва ундан кичик ёшдаги футболчилар бўлади. Асосий мақсад, жамоада маҳаллий футболчилар сонини ошириш.
 
22 декабрдан бошлаб асосий таркиб йиғин бошлайди. 10 январь куни машғулотлар Тошкентга кўчади. Олган маълумотларимизга кўра, "Пахтакор"дан ижара асосида "Динамо" сафига келиб қўшилган футболчилар 2014 йилда ҳам жамоада қоладилар. Албатта, бу мухлисларни қувонтириши аниқ.

"Жамоа раҳбарияти етарли шароитларни яратиб берганлиги учун улардан миннатдормиз. Барча футболчилар билан ҳисоб-китоб ишлари якунига етган. Клуб раҳбарияти ўз олдига қўйган мажбуриятини тўлиқ адо этиб бўлган. Энди янги мавсумга яхши тайёргарлик кўришимиз керак. Маҳаллий футболчиларга ҳам жиддий эътибор қаратиш ниятидамиз. Режага февраль ойида хориж сафари ҳам киритилган. Жорий мавсум жамоа шарафини ҳимоя қилган футболчилар биз билан қолишга тайёрлар", - дейди Равшан Акмалович.